అయోధ్య రాముని ప్రాణప్రతిష్ఠ రోజున ఏఏ రాష్ట్ర ప్రభుత్వాలు సెలవు ప్రకటించాయో తెలుసా..?

దిశ, ఫీచర్స్ : జనవరి 22 దేశంలో ఓ ప్రత్యేకమైన రోజు. ఈ రోజు కోసం దేశవ్యాప్తంగా ప్రజలు ఆసక్తిగా ఎదురుచూస్తున్నారు. భారతదేశంలోనే కాకుండా విదేశాలలో కూడా ప్రజలు రాం లల్లా విగ్రహ ప్రతిష్టాపన రోజు కోసం ఎంతో ఉత్సాహంగా వేచి చూస్తున్నారు. అయోధ్య రామమందిరం ప్రారంభోత్సవాన్ని పురస్కరించుకుని దేవాలయాలు, రోడ్లు, విమానాశ్రయాలు, రైల్వేస్టేషన్లను సర్వాంగ సుందరంగా తీర్చిదిద్దుతున్నారు. ఈ చారిత్రాత్మకమైన రోజున అనేక రాష్ట్రాల్లో ప్రభుత్వ సెలవులు ప్రకటించాయి.

ఉత్తరప్రదేశ్ ముఖ్యమంత్రి యోగి ఆదిత్యనాథ్ ప్రాణ ప్రతిష్ట వేడుక సందర్భంగా రాష్ట్ర వ్యాప్తంగా సెలవు ప్రకటించారు. జనవరి 22న ఉత్తరప్రదేశ్‌లో అన్ని విద్యాసంస్థలు, ప్రభుత్వ కార్యాలయాలు, దుకాణాలు మూసి ఉంచాలని నిర్ణయించారు. ఈ మేరకు ప్రభుత్వం ఉత్తర్వులు కూడా జారీ చేసింది. దీంతో పాటు రాష్ట్రంలో మద్యం దుకాణాలను మూసి ఉంచాలని ఆదేశాలు జారీ చేశారు. ఇది కాకుండా, రాజధాని లక్నోలో జనవరి 22న మాంసం దుకాణాలు మూసివేయాలని ఆదేశాలు జారీ చేశారు.

జనవరి 22న యూపీలో దీపావళి జరుపుకోనున్నారు

జనవరి 22వ తేదీ సాయంత్రం నుంచి ఉత్తరప్రదేశ్‌లోని ఇళ్లు, ఘాట్‌లు, దేవాలయాల్లో దీపాలు వెలిగించాలని ముఖ్యమంత్రి యోగి ఆదిత్యనాథ్‌ కోరారు. దీనితో పాటు రాష్ట్రంలోని అన్ని కార్యాలయాలు, పాఠశాలలు, కళాశాలలను అలంకరించాలని ఆదేశించారు. రాష్ట్రంలో జనవరి 22న దీపావళి పండుగలా జరుపుకోవాలని కోరారు. ఈ రోజు కోసం రాష్ట్ర ప్రజలు కూడా ఎంతో ఉత్సాహంతో ఎదురుచూస్తున్నారు.

గోవాలో కూడా ప్రాణ ప్రతిష్ట..

ఉత్తరప్రదేశ్ తరహాలో, గోవాలో కూడా జనవరి 22ని ప్రభుత్వ సెలవు దినంగా ప్రకటించారు. దేశంలోని అందమైన రాష్ట్రాల్లో ఒకటైన గోవాలో కూడా జనవరి 22న వేడుకలు నిర్వహించనున్నారు. రాష్ట్ర ముఖ్యమంత్రి ప్రమోద్ సావంత్ మాట్లాడుతూ రామ్ లల్లా విగ్రహ ప్రతిష్ఠాపన చేయడం ఎంతో ఆనందంగా ఉందని అన్నారు. ఆ రోజున గోవాలో కూడా అన్ని పాఠశాలలు, ప్రభుత్వ కార్యాలయాలకు సెలవును ప్రకటించారు.ఈ ప్రత్యేకమైన రోజును దీపావళిలా ఆనందంగా, ఉత్సాహంగా జరుపుకోవాలని అన్నారు. ముఖ్యమంత్రి ప్రమోద్ సావంత్ స్వయంగా జనవరి 22న అయోధ్య దీక్షలో పాల్గొనేందుకు వెళ్లనున్నారు.

జనవరి 22న దీపావళి జరుపుకోవాలని ప్రధాని విజ్ఞప్తి

రాజస్థాన్‌లోని గ్రేటర్ మున్సిపల్ కార్పొరేషన్‌లో జనవరి 22 న సెలవు ప్రకటించారు. భజన్‌లాల్ ప్రభుత్వం కూడా ఈ రోజు పబ్లిక్ హాలిడే ప్రకటించవచ్చని సమాచారం. దీపావళి మాదిరిగానే జనవరి 22వ తేదీని తమ ఇళ్లలో దీపాలు వెలిగించాలని ప్రధాని నరేంద్ర మోదీ దేశ ప్రజలను కోరారు.