ఉత్కంఠగా ఇండియా-ఇంగ్లాండ్ మ్యాచ్.. ‘మధ్యలో వీడెవడురా బాబు’..
దిశ, డైనమిక్ బ్యూరో: చాలా మందికి క్రికెట్ అంటే ఇష్టం ఉంటుంది. అందులోనూ ఇష్టమైన క్రికెటర్ కోసం ఏ మ్యాచ్ జరిగినా టీవీలకే అతుక్కుపోతుంటారు. మరికొందరు స్టేడియానికి వెళ్లి మరీ చూస్తూ ఉంటారు. ఇంకొందరు అయితే ఏకంగా మ్యాచ్ మధ్యలో గ్రౌండ్ లోపలికి దూసుకెళ్తుంటారు. ప్రస్తుతం ఇలాంటి పనులే చేస్తూ ఓ వ్యక్తి వివాదాల పాలవుతున్నాడు.
ఇండియా జెర్సీ వేసుకొని గ్రౌండ్‌లోకి నేరుగా వచ్చేస్తున్నాడు. అటు.. ఇటు.. పోయి.. చివరకు స్టార్ క్రికెటర్లను ఇబ్బంది పెడుతూ నెట్టింట వైరల్‌గా మారాడు.. అతడు ఎవరో కాదు.. యూట్యూబర్ డేనియల్ జార్వీస్.. ఇతను ప్రతిసారి మ్యాచ్ మధ్యలో వస్తుండటంతో ‘‘అస్తమానం వీడి ఎంట్రీ ఏంట్రా బాబు’’ అంటూ నెట్టింట ట్రోల్స్ చేస్తున్నారు.
ప్రస్తుతం జరుగుతున్న ఇండియా వర్సెస్ ఇంగ్లాండ్ సిరీస్‌ నాల్గవ టెస్టులో కూడా ఉమేష్ యాదవ్ బౌలింగ్ వేస్తున్నప్పుడు డేనియల్ ఒక్కసారిగా మైదానంలోకి దూసుకొచ్చాడు. వెంటనే అప్రమత్తమైన స్టేడియం సిబ్బంది అదుపులోకి తీసుకొని పోలీసులకు అప్పగించారు. గతంలో కూడా రెండుసార్లు ‘జోర్వో 69’ జెర్సీతో ఓ సారి బ్యాట్స్ మాన్‌లా ఏకంగా ప్యాడ్స్, హెల్మెట్ పెట్టి బ్యాట్ పట్టుకొని స్టేడియంలోకి రాగా.. మధ్యలోనే గుర్తించిన భద్రతా సిబ్బంది లాక్కెల్లారు.
మరోసారి నేను ఇండియన్ ప్లేయర్ అంటూ గ్రౌండ్‌లోకి రావడంతో అరెస్ట్ అయ్యాడు. అయితే ఇప్పుడు ఏకంగా బౌలింగ్ వేసేందుకు బరిలోకి దిగడం గమనార్హం. దీనిపై నెట్టింట చర్చ నడుస్తోంది. తరచూ గ్రౌండ్‌లోకి వచ్చినా.. గుర్తించలేనంతగా నిర్లక్ష్యంగా భద్రతా సిబ్బంది ఉందా అంటూ క్రికెట్ అభిమానులు మండిపడుతున్నారు. గతంలోనూ ఇండియన్ క్రికెటర్ రోహిత్ శర్మ ఔట్ అవ్వగానే డేనియల్ మాస్క్ వేసుకొని ఎంట్రీ ఇచ్చాడు. ఇండియన్ జెర్సీతో గ్రౌండ్ లోకి వచ్చి హంగామా చేశాడు. ఇది కాస్తా వివాదాస్పదం అవ్వడంతో హెడింగ్లీ స్టేడియంలో ఎంట్రీ లేదని జీవితకాల నిషేధాన్ని ప్రకటించిన విషయం తెలిసిందే.
