ఆఫ్రికా జిబౌటీలో పడవ బోల్తా.. 16 మంది మృతి, 28 మంది మిస్సింగ్: UN
దిశ, నేషనల్ బ్యూరో: ఆఫ్రికాలోని జిబౌటి తీరంలో ఘోర ప్రమాదం చోటుచేసుకుంది. 77 మంది వలసదారులతో ప్రయాణిస్తున్న పడవ బోల్తా పడటంతో ప్రమాదంలో 16 మంది మృతి చెందగా, 28 మంది తప్పిపోయినట్లు ఐక్యరాజ్యసమితి అంతర్జాతీయ వలసల సంస్థ మంగళవారం తెలిపింది. అయితే ఈ ప్రమాదం ఏ రోజు జరిగిందనే విషయాన్ని మాత్రం పేర్కొనలేదు. ప్రస్తుతం మిగతా వారిని కనిపెట్టడానికి రెస్క్యూ ఆపరేషన్ కొనసాగుతోంది. ఇంతకుముందు ఏప్రిల్ 8న జిబౌటికి ఈశాన్య ప్రాంతంలోని గోడోరియా తీరంలో 60 మందితో ప్రయాణిస్తున్న ఒక పడవ మునిగిపోగా, ఈ ప్రమాదంలో పిల్లలతో సహా 38 మంది వలసదారుల మృతదేహాలను స్వాధీనం చేసుకోగా, మరో ఆరుగురు వ్యక్తులు కనిపించకుండా పోయారని ఇంటర్నేషనల్ ఆర్గనైజేషన్ ఫర్ మైగ్రేషన్ (ఐఓఎం) తెలిపింది. ఈ ఘటన జరిగిన కొద్ది రోజులకే ఇప్పుడు 77 మందితో వెళ్తున్న పడవ బోల్తా పడింది. ప్రతి సంవత్సరం, అనేక మంది ఆఫ్రికన్ వలసదారులు ఎర్ర సముద్రం మీదుగా ప్రమాదకరమైన తూర్పు మార్గంలో ప్రయాణిస్తూ సౌదీ అరేబియా చేరుకుంటారు.
