20 ఏళ్ళ ఉత్సవాలకు బ్రేక్… డిసైడ్ చేసిన గులాబీ బాస్
దిశ, తెలంగాణ బ్యూరో : టీఆర్ఎస్ ప్లీనరీ వరుసగా మూడో ఏడాది కూడా జరుగనట్టే. 20 ఏండ్ల ఉత్సవాలు నిర్వహించడం లేదంటూ పార్టీ నేతలకు సమాచారమిచ్చారు. కరోనా సెకండ్వేవ్ నేపథ్యంలో ప్లీనరీని వాయిదా వేస్తున్నట్లు పార్టీ అధినేత, సీఎం కేసీఆర్పార్టీ శ్రేణులకు తెలిపారు. ఈసారి ప్లీనరీకి ఆరు లక్షల మందిని సమీకరించాలని కేసీఆర్ ఇప్పటికే పార్టీ నేతలకు సూచించారు. దీనిపై జిల్లాల వారీగా పార్టీ నేతలకు కూడా బాధ్యతలిచ్చారు. కానీ కరోనా నేపథ్యంలో టీఆర్ఎస్ ద్విదశాబ్ది ఉత్సవాలు వాయిదా వేసేందుకు నిర్ణయం తీసుకున్నారు. కరోనా వ్యాధి మళ్లీ విజృంభిస్తున్న నేపథ్యంలో పార్టీ అధిష్ఠానం ఈ నిర్ణయం తీసుకుంది. టీఆర్ఎస్ ఆవిర్భవించి ఈ నెల 27 నాటికి 20 ఏళ్లు పూర్తవుతున్న సందర్భంగా ఘనంగా వేడుకలు నిర్వహించాలని భావించారు.
అయితే, ప్రస్తుతం కరోనా తీవ్రత.. మినీ మునిసిపల్‌ ఎన్నికల నేపథ్యంలో ఉత్సవాలను వాయిదా వేశారు. 2001 ఏప్రిల్ 27న తెలంగాణ సాధన లక్ష్యంగా ఉద్యమపార్టీగా టీఆర్ఎస్ ఆవిర్భవించింది. తెలంగాణ ఏర్పాటు తర్వాత పూర్తి రాజకీయ పార్టీగా రూపాంతరం చెందింది. 2004 అసెంబ్లీ ఎన్నికల్లో తొలిసారిగా టీఆర్ఎస్ జెండాతో ఎన్నికల పోటీకి దిగారు. అప్పుడు 54 స్థానాల్లో పోటీ చేస్తే 26 స్థానాల్లో గెలిచారు. ఆ తర్వాత 2008 ఉప ఎన్నికల్లో 16 స్థానాల్లో పోటీకి దిగి ఏడు స్థానాలు, 2009 అంసెబ్లీ ఎన్నికల్లో 45 స్థానాల్లో పోటీ చేసి 10 స్థానాల్లో గెలిచారు. ఈ ఎన్నికల్లో టీఆర్ఎస్ అభ్యర్థులు 13 చోట్ల డిపాజిట్లు కోల్పోయారు. ఆ తర్వాత పరిస్థితులు టీఆర్ఎస్కు అనుకూలిస్తూ వచ్చాయి. 2010 ఉప ఎన్నికల్లో 11 స్థానాల్లో పోటీ చేస్తే అన్నింటా గెలిచారు. 2011లో ఒక్క స్థానానికి జరిగిన ఉప ఎన్నికల్లో బంపర్ మెజార్టీతో గెలిచారు. ఆ తర్వాత 2014లో తెలంగాణ స్వరాష్ట్రంలో 119 సీట్లలో పోటీ చేసిన టీఆర్ఎస్ 63 స్థానాలు దక్కించుకుని ప్రభుత్వాన్ని ఏర్పాటు చేసింది. అనంతరం 2019 ఎన్నికల్లో 119 స్థానాల్లో పోటీ చేసి 88 స్థానాలను దక్కించుకుంది.
అయితే టీఆర్ఎస్ పార్టీ ప్రతిఏటా ఏప్రిల్ 27న ప్లీనరీని నిర్వహిస్తూ వస్తోంది. కానీ 2019లో పార్లమెంట్ ఎన్నికల సందర్బంగా నిర్వహించలేదు. ఆ తర్వాత 2020లో కరోనా లాక్డౌన్ ఉండగా… ఈ ఏడాది కూడా కరోనా కారణంగా వాయిదా వేయాల్సి వచ్చింది. ప్రస్తుతానికి ద్వీదశాబ్ధి ఉత్సవాలను నిర్వహించడం లేదంటూ గులాబీ బాస్… పార్టీ నేతలకు సమాచారమిచ్చారు.
