బాలీవుడ్‌ స్టార్ హీరోతో సూర్య.. మరో అతిథి పాత్రకు సిద్ధం
దిశ, సినిమా : కమల్ హాసన్ హీరోగా లోకేష్ కనగరాజు డైరెక్షన్‌లో వచ్చిన 'విక్రమ్' మూవీ దేశవ్యాప్తంగా భారీ వసూళ్లు రాబడుతోంది. ఇందులో కోలీవుడ్ స్టార్ హీరో సూర్య పోషించిన మూడు నిమిషాల గెస్ట్ రోల్ సినిమాను వేరే లెవెల్‌కు తీసుకెళ్లడంతో తన పేరు మారుమోగిపోతోంది. ఇదిలా ఉంటే.. సూర్య మరో గెస్ట్ రోల్‌కు సిద్ధమవుతున్నట్లు టాక్ వినిపిస్తోంది. విషయానికొస్తే.. గతంలో సుధా కొంగర దర్శకత్వంలో సూర్య ప్రధాన పాత్ర పోషించిన 'సూరారై పోట్రు' మూవీ బ్లాక్ బస్టర్ హిట్ సాధించిన సంగతి తెలిసిందే. ఓటీటీ వేదికగా తెలుగు, తమిళ్, మలయాళం, కన్నడ భాషల్లో విడుదలైన ఇదే సినిమాను ఇప్పుడు హిందీలో రీమేక్ చేయనున్నారు. అక్షయ్ కుమార్ హీరోగా నటించనున్న ఈ చిత్రంలో సూర్య గెస్ట్ రోల్‌లో కనిపించనున్నాడు. ఈ అప్‌డేట్‌ను స్వయంగా తనే సోషల్ మీడియా ద్వారా అనౌన్స్ చేసిన సూర్య.. అక్షయ్ కుమార్, డైరెక్టర్ సుధా కొంగరకు థ్యాంక్స్ చెప్పాడు. ఈ సందర్భంగా అక్షయ్‌తో సెల్ఫీ పిక్ పోస్ట్ చేయగా ప్రస్తుతం నెట్టింట వైరల్ అవుతోంది.
