సీబీఎస్ఈ 12వ తరగతి ఫలితాలు విడుదల
న్యూఢిల్లీ : సెంట్రల్ బోర్డ్ ఆఫ్ సెకండరీ ఎడ్యుకేషన్ (సీబీఎస్ఈ) 12వ తరగతి టర్మ్‌-1 ఫలితాలు శనివారం విడుదలయ్యాయి. నవంబర్‌ నుంచి డిసెంబర్‌ మధ్యలో జరిగిన టర్మ్‌-1 పరీక్షల్లో విద్యార్థుల ఫలితాల జాబితాలను సంబంధిత పాఠశాలలకు పంపించినట్టు సీబీఎస్ఈ అధికార ప్రతినిధి రమా శర్మ తెలిపారు. మార్కుల కోసం విద్యార్థులు తమ పాఠశాలలకు వెళ్లి సంప్రదించాలని వెల్లడించారు.
గత వారంలో పదో తరగతి టర్మ్‌-1 ఫలితాలు విడుదల చేసినప్పుడు కూడా విద్యార్థుల మార్క్స్ షీట్స్‌ను బోర్డు అధికారులు సంబంధిత పాఠశాలలకు ఈమెయిల్‌ చేసిన విషయం తెలిసిందే. ఈ ఏడాది పదో తరగతి, 12వ తరగతి సిల‌బ‌స్‌ను సీబీఎస్ఈ బోర్డు రెండు భాగాలుగా విభ‌జించి టర్మ్‌-1, టర్మ్‌-2గా పరీక్షలు నిర్వహించనున్నట్టు అధికారులు స్పష్టం చేశారు. ఇటీవల టర్మ్‌ -1 పదో తరగతి ఫలితాలు విడుదల చేసిన సీబీఎస్ఈ బోర్డు తాజాగా 12వ తరగతి ఫలితాలను విడుదల చేసింది. కాగా, ఏప్రిల్‌ 26 నుంచి 12వ తరగతి టర్మ్‌-2 పరీక్షలు జరగనున్నట్టు సీబీఎస్ఈ బోర్డు ప్రకటించింది.
