మేడపైన గంజాయి మొక్కలు పెంపకం చేస్తున్న వ్యక్తి అరెస్ట్...
దిశ, వరంగల్ : సులభంగా డబ్బు సంపాదించడంతో పాటు తన అవసరాల కోసం ఒక అడుగు ముందుకేసి తన ఇంటి మేడ పైన గంజాయి మొక్కల పెంచి చివరికి పోలీసులకు చిక్కి కటాకటాలు పాలైనాడు ఓ వ్యక్తి. పోలీసులు తెలిపిన వివరాల ప్రకారం… వరంగల్ శివనగర్ ప్రాంతానికి చెందిన పల్లెబోయిన కుమార్ తన ఇంటి మేడపైనే పూల కుండీలో గంజాయి మొక్కల పెంపకం చేపట్టాడు. గురువారం రైల్వే స్టేషన్ లో యాంటీ డ్రగ్స్ టీం పోలీసులకు పక్కా సమాచారం రావడంతో పోలీసులు మత్తు పదార్థాలను పసిగట్టే పోలీస్ జాగిలంతో మేడ పైన గంజాయి మొక్కలను గుర్తించి ఆ మొక్కలను స్వాధీనం చేసుకున్నారు. ఇంటి యజమానిని, గంజాయి మొక్కలు పెంపకం చేపట్టిన నిందితుడిని డ్రగ్స్ కంట్రోల్ టీం పోలీసులు మీల్స్ కాలనీ పోలీసులకు అప్పగించారు.
అనంతరం వరంగల్ పోలీస్ కమిషనరేట్ పరిధిలో ఇంతేజార్ గంజ్ పోలీసుల ఆధ్వర్యంలో గురువారం వరంగల్ రైల్వే స్టేషన్ లో పోలీస్ జాగిలంతో ముమ్మర తనిఖీలు చేపట్టారు. ఈ తనిఖీల్లో భాగంగా పోలీసులు అనుమానస్పదంగా కనిపించిన ప్రయాణికుల సామానుతో పాటు, బ్యాగ్ లను పోలీసులు పోలీస్ జాగిలంతో తనిఖీలు చేయించారు. ఈ సందర్భంగా యాంటీ డ్రగ్స్ టీం ఇంచార్జి ఇన్స్ స్పెక్టర్ సురేష్ ప్రయాణికులతో మాట్లాడుతూ… ఎవరైనా గుర్తు తెలియని వ్యక్తులు రహస్యం గంజాయి లాంటి మత్తు పదార్థాలను విక్రయిస్తున్న, వినియోగిస్తున్న తక్షణమే 8712584473 సెల్ నంబర్ కు సమాచారం అందించాలని, సమాచారం అందించిన వారి వివరాలు గోప్యంగా ఉంచబడుతాయని తెలిపారు. ఈ తనిఖీల్లో యాంటీ డ్రగ్స్ టీమ్ ఇన్స్పెక్టర్స్ జె సురేష్, ఆర్ ఐ శివ కేశవులు, ఆర్ ఎస్ఐ పూర్ణ చంద్రా రెడ్డి, ఎస్ఐ చాంద్ పాషా, ఏఎస్ఐ సాంబయ్య, సిబ్బంది పాల్గొన్నారు.
