డంపింగ్ యార్డ్ శిలాఫలకం ధ్వంసం
దిశ, పరిగి : డీఎస్పీ, ఓ సీఐ, ఐదుగురు ఎస్ఐలు, పాతిక మందికి పైగా కానిస్టేబుళ్ల బందోబస్తు మధ్య ఏర్పాటు చేసిన శిలాఫలకం పట్టుమని పది రోజులు కూడా ఉంచకుండా పగల గొట్టారు. పరిగి మండలం మాదారం గ్రామ శివారులో పరిగి మున్సిపల్ కు చెందిన డంపింగ్ యార్డు విషయంలో ఆందోళన, అడ్డగింత, అరెస్టులు మధ్య ఈనెల 3వ తేదీన శిలాఫలకం ఆవిష్కరించారు. మాదారం, నజీరాబాద్ తండా, రంగాపూర్ తండా, హనుమాన్ గండి తండా వాసులంతా వ్యతిరేకిస్తున్నారని తెలుసుకొని చివరి క్షణంలో స్థానిక ఎమ్మెల్యే టి.రామ్మోహన్ రెడ్డి శంకుస్థాపన చివరి నిమిషంలో విరమించుకున్నారు. సుమారు 23 లక్షలతో నిర్మించ తలపెట్టిన శిలాఫలకాన్ని మున్సిపల్ కమిషనర్ వెంకటయ్యతో ఆవిష్కరింపజేశారు ఈ శిలాఫలకం ఏర్పాటు చేశాక కూడా వారం రోజుల పాటు పరిగి పోలీసులు దిమ్మెకు కాపాలా ఏర్పాటు చేశారు. శంకుస్థాపన చేసి పట్టు మని పదిహేను రోజులు కూడా గడవక ముందే శిలాఫలకాన్ని ధ్వంసం చేశారు.
