పేలిన సిలిండర్... ఇల్లు దగ్ధం..

దిశ, తాండూర్ : తాండూర్ మండలం మాదారం టౌన్షిప్ గ్రామం రాజీవ్ నగర్ లో నివాసం ఉంటున్న రాదండి లక్ష్మి ఇల్లు శుక్రవారం ఉదయం ప్రమాదవశాత్తు పూర్తిగా దగ్ధమైంది. అగ్ని ప్రమాదం జరిగి సిలిండర్ పేలిన సమయంలో ఎవరు కూడా ఇంట్లో లేకపోవడంతో ప్రాణ నష్టం తప్పింది. ఇంటికి మంటలు వ్యాపించడంతో స్థానికులు గమనించి బిందెలు, బకెట్లతో మంటలు ఆర్పేందుకు ప్రయత్నాలు చేశారు. అయినా అప్పటికే నష్టం జరిగిపోయింది. అగ్ని ప్రమాదం గురించి బెల్లంపల్లి ఫైర్ స్టేషన్ స్థానికులు సమాచారం ఇచ్చారు. ఫైర్ స్టేషన్ సిబ్బంది చేరుకొని మంటలను పూర్తిగా ఆరివేశారు. కాంగ్రెస్ మంచిర్యాల జిల్లా ఉపాధ్యక్షుడు సూరం రవీందర్ రెడ్డి, మాదారం ఎస్సై సౌజన్య, గ్రామ కార్యదర్శి సౌందర్య దగ్దమైన ఇంటిని సందర్శించి బాధితురాలిని వివరాలు అడిగి తెలుసుకున్నారు. అగ్ని ప్రమాదంలో ఇంట్లో ఉన్న బీరువా, కూలర్, మంచాలు నిత్యవసర సామాగ్రి దగ్ధం అయ్యాయి. సుమారు లక్ష రూపాయల పైగా వరకు ఆస్తి నష్టం సంభవించిందని బాధితురాలు లక్ష్మి ఆవేదన వ్యక్తం చేసింది. అగ్ని ప్రమాదంలో సర్వస్వం కోల్పోయిన తనను ప్రభుత్వం ఆదుకోవాలని లక్ష్మి విజ్ఞప్తి చేసింది.