దేశ రాజకీయాల్లో ఎర్రజెండా కీలకపాత్ర : సీపీఎం రాష్ట్ర కార్యదర్శి తమ్మినేని వీరభద్రం

దిశ, మునుగోడు : దేశ, రాష్ట్ర రాజకీయాల్లో ఎర్రజెండా కీలక పాత్ర వహిస్తుందని సీపీఎం రాష్ట్ర కార్యదర్శి తమ్మినేని వీరభద్రం అన్నారు. శనివారం మునుగోడు మండలంలోని కల్వకుంట్ల గ్రామంలో సీపీఎం పార్టీ ఆధ్వర్యంలో నూతనంగా నిర్మాణం చేపట్టిన మాజీ సర్పంచ్ బొద్దు పెద్ద నర్సింహ అమర వీరులస్మారక భవనం, పార్టీ కార్యాలయం ప్రారంభోత్సవానికి ఆయన ముఖ్య అతిథిగా హాజరయ్యారు. ఈ సంద్భంగా ఆయన మాట్లాడుతూ ఇటీవల జరిగిన మునుగోడు ఉపఎన్నికల్లో టీఆర్ఎస్ పార్టీ గెలుపునకు ఉభయ కమ్యూనిస్టుల పాత్ర కీలకమన్నారు. రాబోయే ఎన్నికల్లో మతతత్వ పార్టీ బీజేపీని ఓడించేందుకు కలిసి వచ్చే పార్టీలతో సీపీఎం పార్టీ పనిచేస్తుందన్నారు. బీఆర్ఎస్ ప్రభుత్వం వీఆర్ఏలకు ఉద్యోగ భద్రతను రెగ్యులరైజ్ చేసినందుకు సీపీఎం రాష్ట్ర కమిటీ తరఫున అభినందనలు తెలిపారు.

అదే తరహాలో జూనియర్ కార్యదర్శులను రెగ్యులరైజ్ చేయాలని, పోడు భూముల పట్టాలు ఇవ్వాలని సూచించారు. తెలంగాణ రాష్ట్రంలో బీఆర్ఎస్ ప్రభుత్వం ప్రవేశపెట్టిన పథకాలలో కొన్ని లోపాలు ఉన్నాయని వాటిని సరిచేసుకోవాలని ఆయన సూచించారు. తెలంగాణలోని నిరుపేదలకు ఇంటి నిర్మాణానికి రాష్ట్ర ప్రభుత్వం ఐదు లక్షలు, కేంద్ర ప్రభుత్వం 10 లక్షల ఇవ్వాలని డిమాండ్ చేశారు. ఈ కార్యక్రమంలో జిల్లా కార్యదర్శి ముదిరెడ్డి సుధాకర్ రెడ్డి, జిల్లా కార్యదర్శి వర్గ సభ్యుడు బండా శ్రీశైలం, పాలడుగు నాగార్జున, ప్రజా నాట్య మండలి రాష్ట్ర అధ్యక్షులు ఆనంద్, జిల్లా నాయకులు నాంపల్లి చంద్రమౌళి, మునుగోడు, మర్రిగూడ మండలాల కార్యదర్శులు మిర్యాల భరత్ కుమార్, ఏర్పుల యాదయ్య, డివైఎఫ్ఐ మాజీ రాష్ట్ర కార్యదర్శి ఐతగోని విజయ్ కుమార్, కేవీపీఎస్ జిల్లా ఉపాధ్యక్షుడు బొట్ట శివకుమార్, వెల్మకన్నె ఎంపీటీసీ చాపల మారయ్య, మండల నాయకులు నారగోని నరసింహ, యాసరాని శ్రీను, జిల్లా యాదయ్య, ఐతగొని యాదయ్యగౌడ్, వేముల లింగస్వామి, వరికుప్పల ముత్యాలు, తదితరులు పాల్గొన్నారు.