93 శాతం ఉత్పత్తి సాధించిన రామగుండం 3 ఏరియా : జీఎం

దిశ, రామగిరి: ఏప్రిల్ నెలలో రామగుండం-3 ఏరియా 93 శాతం, అడ్రియాల ప్రాజెక్టు ఏరియా 48 శాతం ఉత్పత్తి సాధించినట్లు ఆర్జీ3, ఏపీఏ జీయం ఎన్. సుధాకర్ రావు తెలిపారు. ఏప్రిల్ నెల బొగ్గు ఉత్పత్తి పై మండలకేంద్రంలోని జీయం కార్యాలయంలో విలేకరులతో సమావేశం నిర్వహించారు. ఈ సందర్భంగా జీయం మాట్లాడుతూ ఏప్రిల్ నెలలో ఆర్జీ3 ఏరియాకు నిర్దేశించిన 5.38 లక్షల టన్నులకు 5.03 లక్షల టన్నులు ఉత్పత్తి సాధించిందని, 7.44 లక్షల టన్నుల బొగ్గు రవాణా జరిగిందన్నారు. అడ్రియాల ప్రాజెక్ట్ ఏరియా 1.68 లక్షల టన్నులకు 0.80 లక్షల టన్నుల ఉత్పత్తి జరిగిందని, 0.57 లక్షల టన్నుల బొగ్గు రవాణా చేసినట్లు వివరించారు. ఉద్యోగులందరూ బాధ్యతాయుతంగా పనిచేస్తూ సింగరేణి సంస్థ నిర్దేశించిన లక్ష్యాలను సాధించడానికి కృషి చేయాలన్నారు.