బండి సంజయ్‌ అరెస్ట్‌‌పై స్పందించిన ఆయన భార్య.. పోలీసులు ఎలా వ్యవహరించారంటే..?

దిశ, కరీంనగర్​ బ్యూరో: ఇంటికి పెద్ద దిక్కుగా ఉన్న తన తల్లిని కొల్పొయి దుఃఖంలో ఉన్నామని, ఆమె చిన్న కర్మకు హాజరుకావడానికి వస్తే ఇలా బలవంతంగా అరెస్ట్​ చేస్తారా అని బీజేపీ రాష్ర్ట అధ్యక్షుడు, కరీంనగర్​ఎంపీ బండి సంజయ్​ భార్య అపర్ణ అన్నారు. సంజయ్​అత్తమ్మ, తన తల్లి ఇటీవల మరణించగా బుధవారం ఉదయం 6 గంటలకు చిన్న కర్మకు హాజరు అయ్యేందుకు సంజయ్​వచ్చారని అపర్ణ తెలిపారు. 7గంటల తరువాత సంజయ్​అందుబాటులోనే ఉండే వారని రాత్రి పూట వచ్చి అరెస్ట్​ చేయాల్సిన అవసరం ఏమీ వచ్చిందని ఆమె ప్రశ్నించారు. అర్ధరాత్రి 12–30 గంటలు దాటిన తరువాత సుమారు 40 మంది పోలీసులు ఇంటికి వచ్చారని పేర్కొన్నారు. ఒక పార్లమెంట్​సభ్యుడు అయిన సంజయ్‌ని అర్ధరాత్రి ఎందుకు అరెస్ట్​ చేయాల్సి వచ్చిందో పోలీసులు చెప్పాలని అపర్ణ డిమాండ్ చేశారు. పోలీసులను అడిగితే ముందస్తు అరెస్ట్​అని చెప్పారని, సంజయ్​హార్ట్​పేషెంట్​కావడంతో ప్రతి రోజు నాలుగు టాబ్లెట్స్ తప్పకుండా వేసుకోవాలని, మెడిసిన్ ఇద్దామని వస్తే ఇవ్వనీయకుండా గుంజుకొని తీసుకెళ్లారని ఆమె వాపోయారు. ఒక ప్రజాప్రతినిధి పట్ల పోలీసులు ఇలాగే ప్రవర్తిస్తారా అని అపర్ణ ప్రశ్నించారు.