Cast Census: చివరి దశకు చేరిన కుల గణన.. స్పీడ్ పెంచిన సర్కార్
దిశ, తెలంగాణ బ్యూరో: తెలంగాణలో కులగణన అంశం చివరి దశకు చేరుకుంది. కులగణన నివేదికపై చర్చించడానికి కేబినేట్ సిద్ధమవుతోంది. కులగణనలోని కీలక అంశాలపై చర్చించడానికి రేపు తెలంగాణ అసెంబ్లీ ప్రత్యేకంగా సమావేశం అవుతోంది. కులగణన వివరాలపై అసెంబ్లీలో స్వల్పకాలిక చర్చ ఉంటుందని సమాచారం. కులగణన ద్వారా బీసీల రిజర్వేషన్లు, ఎస్టీ వర్గీకరణ అంశాలను తేల్చడానికి రేవంత్ సర్కార్ జెట్ స్పీడ్‌తో ముందుకు సాగుతోంది. కులగణన నివేదిక, సామాజిక అంశాల వివరాలు ఇప్పటికే కేబినెట్ సబ్ కమిటీకి అందాయి.
ఎస్సీ వర్గీకరణపై కేబినెట్‌లో రేపు చర్చ
ఇది ఇలా ఉంటే.. ఎస్సీ ఉప కులాల వర్గీకరణపై డాక్టర్జస్టిస్ షమీమ్ అక్తర్ నేతృత్వంలోని ఏకసభ్య న్యాయ కమిషన్ తమ నివేదికను రెడీ చేసింది. నివేదికను ఈరోజు కేబినెట్ సబ్ కమిటీకి అందజేయనున్నది. ఈ నివేదికపై సబ్ కమిటీ అధ్యయనం పూర్తయిన తరువాత..రేపు కేబినెట్ముందుకు వస్తోంది. ఈ రెండు కమిటీల నివేదికలపై కేబినెట్‌లో చర్చించాక.. అసెంబ్లీలో ప్రవేశపెడతారు. వివిధ పార్టీల అభిప్రాయాలను తీసుకొని వర్గీకరణ విధానాన్ని అమల్లోకి తీసుకొస్తారు. రేపు ఉదయం 10 గంటలకు అసెంబ్లీ కమిటీ హాల్‌లో రాష్ట్ర కేబినేట్ భేటీ అవుతుంది. అదేరోజు ఉదయం 11 గంటలకు ఈ అంశాలపై చర్చించడానికి అసెంబ్లీ, శాసనమండలి సమావేశాలు జరగనున్నాయి. ఉభయ సభల్లోనూ బీసీ రిజర్వేషన్లు, ఎస్సీ వర్గీకరణపై సభ్యులు చర్చిస్తారు. గత నెలలో మన్మోహన్సింగ్‌కు నివాళులు అర్పించడానికి ప్రత్యేకంగా సమావేశమైన అసెంబ్లీ .. తరువాత ప్రోరోగ్ చేయలేదు. దీంతో అసెంబ్లీని అత్యవసరంగా సమావేశపర్చడానికి గవర్నర్అనుమతి లేకుండానే సమావేశం ఏర్పాటు చేసుకునే వెసులుబాటు దొరికింది. ఈ అంశంపై చర్చించాక అసెంబ్లీని వాయిదా వేస్తారు.
’స్థానిక’ ఎన్నికల ప్రక్రియ అప్పుడే..
బీసీ రిజర్వేషన్లు, ఎస్సీ వర్గీకరణ అంశాలపై చట్ట పరమైన ప్రక్రియ పూర్తి అయిన తరువాత స్థానిక సంస్థల ఎన్నికల ప్రక్రియకు తెరలేపుతారు. రాష్ట్రస్థాయిలో రిజర్వేషన్లను ఖరారు చేసిన..తరువాత వాటి వివరాలను జిల్లాలకు పంపిస్తారు. జిల్లాల్లో మండలం/గ్రామం/వార్డులకు రిజర్వేషన్ కేటగిరీలను ప్రకటిస్తారు. ఎస్సీ వర్గీకరణ పూర్తికాకపోవడం.. సుప్రీంకోర్టు రాజ్యాంగ ధర్మాసనం సానుకూలంగా తీర్పు ఇవ్వడంతో దానిని తేల్చడానికి కమిటీని నియమించారు. ఆ కమిటీ నివేదికకు కేబినెట్ ఆమోదించిన తరువాత.. అధికారిక ప్రక్రియను ప్రారంభిస్తారు. దీనిద్వారా ఉద్యోగ నియామకాలు చేపడతారు. మాదిగ సామాజక వర్గం ఉద్యోగాల్లో నష్టపోకుండా ఉండేందుకు ఎస్సీ వర్గీకరణ చేసిన తరువాత నోటిఫికేషన్లు ఇస్తామని సీఎం రేవంత్‌రెడ్డి ఇప్పటికే హామీ ఇచ్చారు. అందువల్లే ఎస్సీ వర్గీకరణపై తెలంగాణ సర్కార్ మొగ్గు చూపుతూ.. ముందుకు సాగుతుందని తెలుస్తోంది.
