‘ఆర్య’.. ఇన్నాళ్ల నిరీక్షణకు ప్రతిఫలం : సుస్మితా సేన్

మాజీ మిస్ యూనివర్స్ సుస్మితా సేన్.. చాలా కాలం తర్వాత తెరపై కనిపించబోతోంది. డిస్నీ హాట్ స్టార్‌లో స్ట్రీమింగ్ కాబోతున్న ‘ఆర్య’ వెబ్ సిరీస్‌తో సుస్మిత డిజిటల్ ప్లాట్‌ఫామ్‌లోకి అడుగుపెట్టబోతుంది. ఈ నేపథ్యంలో గురువారం రిలీజ్ అయిన ఆర్య ట్రైలర్ ఆకట్టుకోగా.. ఈ సిరీస్‌లో ‘ఆమె భర్తపై హత్యాయత్నం తర్వాత అనుకోకుండా అక్రమ మాదకద్రవ్యాల రాకెట్‌లో చిక్కుకున్న ఓ మహిళ.. తన ఫ్యామిలీని కాపాడుకునేందుకు ఎలా దందాను కొనసాగించిందనే’ కీలక పాత్రలో సుస్మిత కనిపించనుంది. తను ఇప్పటి వరకు చేసిన పాత్రల్లోనే ఇది పవర్‌ఫుల్ క్యారెక్టర్ కాగా.. విమర్శకులు కూడా ప్రశంసలు కురిపిస్తున్నారు.

కాగా, నీర్జా డైరెక్టర్ రామ్ మాధ్వని డైరెక్షన్‌లో వచ్చిన ఈ వెబ్ సిరీస్ చేసే ముందు సుస్మిత ఒక షరతు పెట్టిందట. నేను పనిచేయడానికి సిద్ధంగా ఉన్నా.. ఇందుకోసం నాకున్న మొత్తాన్ని ఇస్తాను.. కానీ అది నన్ను నటిగా మరో మెట్టు ఎక్కించేలా ఉండాలని కోరిందట. దేవుడి దయ వల్ల చాలా గొప్ప అందమైన స్క్రిప్ట్‌, హాట్ స్టార్ రూపంలో ఫెంటాస్టిక్ ప్లాట్ ఫాం దొరికిందని చెప్పింది. నేను ఏదైనా చేస్తే విలువైనదిగా ఉండాలని అనుకునేదాన్ని అని.. గర్వంగా చెబుతున్న ‘ఆర్య’ వెబ్ సిరీస్ అలాంటి సబ్జెక్టే అని తెలిపింది. ఇన్నాళ్లు వెయిట్ చేసినందుకు ప్రతిఫలం దక్కిందని సంతోషం వ్యక్తం చేసింది.