శరద్ పవార్ కాన్వాయ్ వాహనం బోల్తా
ముంబయి: ఎన్‌సీపీ చీఫ్ శరద్ పవార్ కాన్వాయ్‌లోని వాహనం బోల్తాపడింది. పవార్ ప్రయాణిస్తున్న వాహనం మాత్రం సేఫ్‌గా బయటపడింది. ఈ ఘటన మహారాష్ట్ర పూణె జిల్లాలోని ఖండాల సమీపంలో సోమవారం మధ్యాహ్నం చోటుచేసుకుంది. శరద్ పవార్ పూణె నుంచి ముంబయికి వస్తున్నారు. రాష్ట్ర హైవే పోలీసు విభాగానికి చెందిన డ్రైవర్ నడుపుతున్న వాహనం పవార్ కాన్వాయ్ భాగంగా ప్రయాణిస్తున్నది. లోనావాలాకు దగ్గరలోని ఓ పాత బ్రిడ్జీ వద్దకు రాగానే ఉన్నట్టుండి ఆ జీపు స్కిడ్ అయి బోల్తా పడింది. డివైడర్‌ను ఢీకొట్టింది. వెనుకే వస్తు్న్న పవార్ కారు సురక్షితంగా బయటపడింది. ఈ ఘటనలో ఆ వాహనం నడుపుతున్న పోలీసుకు స్వల్ప గాయాలయ్యాయి. అనంతరం, శరద్ పవార్ కారు నుంచి దిగి గాయపడ్డ పోలీసుకు వైద్య పరీక్షలను పర్యవేక్షించినట్టు పార్టీ కార్యకర్తలు చెప్పారు. వెంటనే ఆ వాహనాన్ని పక్కకు తరలించి ట్రాఫిక్ సుగమమయ్యేలా చర్యలు తీసుకున్నట్టు హైవే పోలీసు తెలిపారు.
