‘ఇండియా’ వర్సెస్ బీజేపీ: జనవరి 18న తొలిపోరు
దిశ, నేషనల్ బ్యూరో: ప్రతిపక్ష ఇండియా కూటమి బీజేపీతో తలపడటానికి సిద్ధంగా ఉందని ఆమ్ ఆద్మీ పార్టీ రాజ్యసభ ఎంపీ రాఘవ్ చద్దా తెలిపారు. జనవరి 18న జరిగే చండీగఢ్ మేయర్ ఎన్నికలు ఈ పోరుకు తెరలేపుతాయని చెప్పారు. మంగళవారం ఆయన ఢిల్లీలోని ఆప్ ప్రధాన కార్యాలయంలో మీడియాతో మాట్లాడారు. ‘ ఇండియా కూటమి తన మొదటి ఎన్నికల్లో పోటీ చేయబోతోంది. చండీగఢ్ మేయర్ ఎన్నిక సాధారణ ఎన్నికలు కాదు. ఇది దేశ రాజకీయ గమనాన్ని మారుస్తుంది. ఈ ఏడాది జరిగే లోక్‌సభ ఎన్నికలకు పునాది వేస్తుంది. బీజేపీ వర్సెస్ ఇండియా తొలి ఎన్నికలుగా దీన్ని పిలుస్తారు. ఈ ఎన్నికల్లో కూటమి చారిత్రాత్మక విజయాన్ని నమోదు అందుకుంటుంది. ఈ గెలుపు చండీగఢ్‌కే పరిమితం కాదు. దేశమంతటా విస్తరిస్తుంది’ అని చెప్పారు. చండీగఢ్ ఎన్నికల్లో ‘ఇండియా’ విజయానికి ప్రజలు సహకరిస్తారని తెలిపారు. ‘ఇండియా’ కూటమి కలిసి ఎన్నికల్లో పోరాడినప్పుడు దాని బలం మరింత పెరుగుతుందని ఈ ఎన్నికలు నిరూపిస్తాయన్నారు. కాగా, గురువారం జరగనున్న చండీగఢ్ మేయర్ ఎన్నికలకు ఆప్, కాంగ్రెస్‌లు పొత్తుకు నిర్ణయం తీసుకున్నాయి. 35 మంది సభ్యులున్న చండీగఢ్ మున్సిపల్ కార్పొరేషన్‌లో బీజేపీకి 14 మంది కౌన్సిలర్లు ఉండగా, ఆప్‌కు 13 మంది, కాంగ్రెస్‌కు ఏడుగురు ఉన్నారు.
