కూలిన హై లెవెల్ ఫ్లైఓవర్.. కళ్ల ముందే భారీ ప్రమాదం!

దిశ, వెబ్‌డెస్క్: నిర్మాణంలో ఉన్న ఓ భారీ హై లెవెల్ ఫ్లైఓవర్ (Fly-over) ఉన్నట్లుండి కూలిపోయింది. కళ్ల ముందే ఈ భారీ ప్రమాదం సంభవించడంతో స్థానికులంతా దిగ్భ్రాంతికి లోనయ్యారు. అయితే రాత్రివేళ కూలడంతో వాహనాల రాకపోకలు చాలా తక్కువగా ఉన్నాయని, ఫలితంగా పెను ప్రమాదం తప్పిందని స్థానికులు చెబుతున్నారు. వివరాల్లోకి వెళితే.. తమిళనాడు (Tamilnadu)లోని తిరుపత్తూరు జిల్లా అంపూర్‌‌లోని చెన్నై - బెంగళూరు నేషనల్ హైవే (Chennai-Banglore National Highway)పై 2023 నుంచి 4 కిలోమీటర్ల పొడవైన హైలెవల్ ఫ్లైఓవర్ నిర్మిస్తున్నారు. బస్ స్టేషన్ - రైల్వే స్టేషన్ మధ్య నిర్మిస్తున్న ఈ ఫ్లైఓవర్ పనులు దాదాపు 60 శాతం పూర్తయ్యాయి. నగరంలో ట్రాఫిక్ రద్దీని తగ్గించి వాహనదారులకు సులభమైన ప్రయాణం అందించాలనే లక్ష్యంతోనే ఈ ఫ్లై ఓవర్ నిర్మిస్తున్నట్లు తెలుస్తోంది.

కాగా.. శనివారం (సెప్టెంబర్ 21) ఉన్నట్లుండి పెద్ద శబ్దం చేస్తూ.. ఫ్లైఓవర్‌కు ఒకవైపు నిర్మించిన ఇనుప నిర్మాణం 20 మీటర్ల మేర కూలిపోయింది. ఈ ఘటనలో ఫ్లైఓవర్‌పై పనిచేస్తున్న బీహార్‌ (Bihar), జార్ఖండ్‌ (Jharkhand)కు చెందిన ఆరుగురు యువకులు తీవ్రంగా గాయపడ్డారు. వెంటనే స్థానికులు వారిని రక్షించి అంబూర్‌ ప్రభుత్వాసుపత్రికి తరలించారు. పోలీసులు కేసు నమోదు చేసుకుని ప్రమాదానికి గల కారణాలపై ఆరా తీస్తున్నారు.