Harihara Veeramallu: త్వరలోనే ‘హరిహర వీరమల్లు’.. భారీ అప్‌డేట్ ఇచ్చిన చిత్ర బృందం
దిశ, సినిమా: పవర్ స్టార్ పవన్ కల్యాణ్ నటిస్తున్న చిత్రాల్లో 'హరి హర వీర మల్లు' ఒకటి. ఈ సినిమా అనౌన్స్ చేసినప్పటి నుంచే ప్రేక్షకుల్లో, ఫ్యాన్స్‌లో భారీ అంచనాలు ఉన్నాయి. అయితే పవన్ కళ్యాణ్ ప్రస్తుతం జనసేన పార్టీ అధ్యక్షుడిగా, ఆంధ్రప్రదేశ్ ఉప ముఖ్యమంత్రిగా ప్రజాసేవకు తన సమయాన్ని కేటాయిస్తూ బిజీగా ఉన్నారు. ఈ కారణంగా ఆయన ప్రకటించిన సినిమాలు అన్నీ పెండింగ్‌లో పడ్డాయి. అయితే.. తాను అంగీకరించిన సినిమాలను పూర్తి చేయాలని నిర్ణయించుకున్నారు పవన్ కల్యాణ్. దీంతో ప్రజెంట్ వరుస అప్‌డేట్స్ ఇస్తూ సందడి చేస్తున్నారు చిత్ర బృందం.
అందులో భాగంగా ‘హరిహర వీరమల్లు’ నుంచి ఒక కీలకమైన అప్‌డేట్‌ను తాజాగా విడుదల చేసింది. ఈ చిత్రానికి సంబంధించిన రెగ్యులర్ షూటింగ్‌ను ఆగస్టు 14న తిరిగి ప్రారంభించినట్టు తాజాగా చిత్ర బృందం వెల్లడించింది. అలాగే ఈరోజు ప్రముఖ యాక్షన్ దర్శకుడు స్టంట్ సిల్వ ఆధ్వర్యంలో ఒక భారీ యుద్ధ సన్నివేశం చిత్రీకరణ ప్రారంభించినట్టు ప్రకటించింది. ఈ భారీ యాక్షన్ సీన్‌లో సుమారు 400-500 మంది ఫైటర్లు అండ్ జూనియర్ ఆర్టిస్టులు పాల్గొంటున్నారు. అంతే కాకుండా.. మునుపెన్నడూ చూడని విధంగా పవన్ కళ్యాణ్‌ని ఒక అద్భుతమైన యోధుడిగా ప్రేక్షకులు ముందుకు తీసుకువచ్చేలా ఈ యుద్ధ సన్నివేశాలను చిత్రీకరించేందుకు నిర్మాణ సంస్థ భారీ షెడ్యూల్‌ను ప్లాన్ చేసింది.
ఇక త్వరలోనే 'హరి హర వీర మల్లు పార్ట్-1 స్వార్డ్ వర్సెస్ స్పిరిట్‌'తో ప్రేక్షకులందరికీ ఒక సరికొత్త అనుభూతిని పంచేందుకు సిద్ధమవుతున్నారు మూవీ యూనిట్. ఇక సినిమాలో బాలీవుడ్ సంచలన నటుడు బాబీ డియోల్, లెజెండరీ నటుడు అనుపమ్ ఖేర్ కీలక పాత్రలో కనిపించనున్నారు. కాగా.. ఈ సినిమా త్వరలో ప్రపంచ వ్యాప్తంగా తెలుగు, హిందీ, తమిళ, మలయాళ భాషల్లో విడుదల చేసేందుకు ప్లాన్ చేస్తున్నారు చిత్ర బృందం.
