ఇంట్లో మహాభారతం చదవడం అశుభమా ? శాస్త్రాలు ఏమి చెబుతున్నాయి..
దిశ, ఫీచర్స్ : మన ఇంట్లో ఉండే పెద్ద వారిలో చాలామంది కాలక్షేపం కోసమో, పుణ్యం కోసమో రామాయణం, భగవద్గీతను, విష్ణుసహస్రనామాలను పఠిస్తూ ఉంటారు. హిందూ మతంలో మహాభారతాన్ని ఐదవ వేదంగా భావిస్తారు. అయితే ఈ మహాభారతాన్ని ఇంట్లో ఉంచుకోకూడదని, దాన్ని ఇంట్లో పఠించకూడదని కొంతమంది పెద్దలు చెబుతారు. మరి దానికి గల కారణాలు ఏంటో చాలా మందికి తెలిసి ఉండదు. ఈ కారణాలేంటో ఇప్పుడు మనం తెలుసుకుందాం..
ఈ రోజుల్లో చాలామంది మహాభారతాన్ని టీవీ లేదా మొబైల్‌లో చూస్తుంటారు. మహాభారతాన్ని హిందూ మతానికి చెందిన పవిత్ర గ్రంథంగా పరిగణిస్తారు. అయితే మహాభారతాన్ని ఇంట్లో ఉంచడం లేదా పారాయణం చేయడం వల్ల జీవితంలో గొడవలు, దురాశలు, ఇంట్లో శత్రుత్వం ఏర్పడుతుందని పండితులు, పెద్దలు చెబుతున్నారు. అలాగే మహాభారతానికి సంబంధించిన ఏదైనా వస్తువును ఇంట్లో ఉంచడం వల్ల అశుభాలు జరిగే అవకాశాలు ఉన్నాయని కొంతమంది నమ్ముతారు.
మహాభారతం చదవడం శుభమా.. అశుభమా ?
హిందూ మతం ప్రకారం, రామాయణం, గీత మొదలైన గ్రంధాలను ఇంట్లో ఉంచడం, పఠించడం శుభప్రదంగా భావిస్తారు. మహాభారతం ఇంట్లో చదివితే ప్రతికూల వాతావరణం ఏర్పడుతుందని చెబుతారు. అలాగే కుటుంబ సభ్యుల మధ్య గొడవలు, వాదనలు పెరుగుతాయని నమ్ముతారు.
శాస్త్రం ప్రకారం మహాభారతాన్ని ఖాళీ ప్రదేశంలో పఠిస్తారు. పాఠాన్ని పూర్తి చేయడానికి ముందు ఒక పేజీని వదిలివేయాలని చెబుతారు. మహాభారతంలో ఒక సోదరుడు సింహాసనం కోసం మరొక సోదరుడికి శత్రువుగా మారి అతని ప్రాణాలను తీయడానికి ప్రయత్నించడం వంటి కొన్ని సంఘటనలు ఈ నమ్మకాల వెనుక కారణాలుగా ఉన్నాయి. అందుకే భారతాన్ని ఇంట్లో పారాయణం చేస్తే గొడవలు పెరుగుతాయని చెబుతుంటారు.
మహాభారతాన్ని ఇంట్లో పెట్టుకోవడం నిషేధం..
రామాయణ, మహాభారత యుద్ధాల మధ్య చాలా తేడాలున్నాయి. రామాయణంలో, సత్యం, బలం మీద యుద్ధం నడిచింది. అయితే మహాభారతంలో యుద్ధం మోసంతో జరిగింది. రామాయణ యుద్ధంలో, రాముడు రాక్షసులతో పోరాడాడు. కానీ మహాభారతంలో, సింహాసనం పై దురాశతో ఒక సోదరుడు మరొక సోదరుడితో పోరాడాడు. అందుకే భారతాన్ని ఇంట్లో పారాయణం చేస్తే సోదరుల మధ్య వివాదాలు, దురాశలు పెరగవచ్చని చెబుతున్నారు. అందుకే చాలామంది మహాభారత పుస్తకాన్ని ఇంట్లో పెట్టుకునేందుకు ఆలోచిస్తారు.
