Road Accident:ఘోర రోడ్డు ప్రమాదం.. ముగ్గురు స్పాట్ డెడ్
దిశ, ప్రతినిధి,కడప: వైఎస్ఆర్ జిల్లా మైదుకూరు మండలం పోరుమామిళ్ల- మైదుకూరు ప్రధాన రహదారి లోని ఎద్దడుగు కణం దగ్గర బైక్ ను టిప్పర్ ఢీకొనడంతో భార్య, భర్త, కుమార్తె అక్కడికక్కడే దుర్మరణం చెందారు. మైదుకూరు పోలీసులు కథనం వరకు వివరాలు ఉన్నాయి. కాశినాయన మండలం చిన్నాయపల్లి గ్రామానికి చెందిన గుర్రాల శ్రీనివాసులురెడ్డి (45) ఆయన భార్య అరుణ (38),కుమార్తె పవిత్ర (15) లు ఆదివారం మోటారు బైకులో మైదుకూరు మండలం తిప్పాయపల్లి గ్రామంలో తమ బంధువు శ్రీనివాస్ రెడ్డి వివాహంకు వెళ్ళారు.
వివాహం అనంతరం ముగ్గురు బైక్ లో వెళ్లి తిరిగి స్వగ్రామానికి వెళుతుండగా ఎద్దడుగు కణం వద్ద వెనకాలే వస్తున్న టిప్పర్ ఢీకొట్టింది. దీంతో వారు క్రింద పడడంతో టిప్పర్ వారిని తొక్కించుకుని వెళుతూ నిలబెట్టకుండా వెళ్లడంతో చూసిన వారు వెంబడించారు. మైదుకూరు పోలీసులకు ఫిర్యాదు చేశారు. ఒకే కుటుంబానికి చెందిన శ్రీనివాసులు రెడ్డి మరియు భార్య, కుమార్తె మృతి చెందడంతో ఆ గ్రామంలో విషాదఛాయలు అలుముకున్నాయి. వీరికి 11 సంవత్సరాల వయస్సు కలిగిన కుమారుడు ఉన్నారు. మైదుకూరు పోలీసులు సంఘటనా స్థలానికి చేరుకుని సహాయక చర్యలు చేపట్టి.. మృతదేహాలను పోస్టుమార్టం నిమిత్తం మైదుకూరు ప్రభుత్వ ఆసుపత్రి తరలించారు. ఈ మేరకు మైదుకూరు పోలీసులు కేసు నమోదు చేసుకుని దర్యాప్తు చేస్తున్నారు.
