చైనా వస్తువులపై ఎక్కువగా ఆధారపడుతున్న భారత్..15 ఏళ్లలో 21 నుంచి 30 శాతం జంప్

దిశ, బిజినెస్ బ్యూరో: భారత్ తన అవసరాల కోసం చైనా పారిశ్రామిక వస్తువులపై ఎక్కువగా ఆధారపడుతుందని ఒక నివేదిక పేర్కొంది. టెలికాం, యంత్రాలు, ఎలక్ట్రానిక్స్ వంటి చైనీస్ ఉత్పత్తుల దిగుమతులు గత 15 ఏళ్లలో 21 శాతం నుండి 30 శాతానికి పెరిగాయని ఎకనామిక్ థింక్ ట్యాంక్ గ్లోబల్ ట్రేడ్ రీసెర్చ్ ఇనిషియేటివ్ (GTRI) నివేదిక తెలిపింది. 2019 నుండి 2024 వరకు, చైనాకు భారతదేశం ఎగుమతులు సంవత్సరానికి 16 బిలియన్ డాలర్ల వద్ద నిలిచిపోగా, అదే సమయంలో చైనా నుంచి భారత్‌కు ఎగుమతులు మాత్రం 2018-19లో 70.3 బిలియన్ డాలర్ల నుండి 2023-24లో 101 బిలియన్ డాలర్లకు పెరిగాయి. ఇది దాదాపు 2.3 రెట్లు వేగంగా వృద్ధి చెందిందని నివేదిక తెలిపింది.

2023-24లో, భారత్ మొత్తం సరుకుల దిగుమతులు 677.2 బిలియన్ డాలర్లు కాగా, వాటిలో ఒక్క చైనా నుంచే 101.8 బిలియన్ డాలర్లుగా ఉంది. అంటే భారత్ మొత్తం దిగుమతుల్లో చైనా వాటా 15 శాతం. అదే భారత పారిశ్రామిక వస్తువుల దిగుమతుల్లో చైనా వాటా 30 శాతంగా ఉంది. ముఖ్యంగా ఎలక్ట్రానిక్స్, టెలికాం, ఎలక్ట్రికల్, యంత్రాలు, రసాయనాలు, ఫార్మాస్యూటికల్స్, ఇనుము, ఉక్కు, బేస్ మెటల్ ఉత్పత్తులు, ప్లాస్టిక్స్, వస్త్రాలు, దుస్తులు, ఆటోమొబైల్స్, వైద్య, తోలు, కాగితం, గాజు వంటి వాటిని భారత్ ఎక్కువగా చైనా నుంచి దిగుమతి చేసుకుంటుంది.

చైనా కంపెనీలు భారతదేశ ఇంధనం, టెలికమ్యూనికేషన్స్, రవాణా రంగాలలో భాగస్వామిగా ఉన్నాయి. స్మార్ట్‌ఫోన్‌లు, ఎలక్ట్రానిక్స్, ఎలక్ట్రిక్, ప్యాసింజర్ వాహనాలు, సోలార్ ఎనర్జీ, ఇంజనీరింగ్ ప్రాజెక్ట్‌లు అనేక ఇతర రంగాలలో కీలక పాత్రలు పోషిస్తున్నాయి. గతంలో భారత సంస్థలు చైనా ఉత్పత్తులను దిగుమతి చేసుకోగా ఇటీవల కాలంలో చైనా కంపెనీలు భారత్‌లోకి ప్రవేశించడంతో పారిశ్రామిక ఉత్పత్తుల దిగుమతులు మరింత వేగంగా పెరుగుతున్నాయని నివేదిక వెల్లడించింది.

చైనాతో పెరుగుతున్న వాణిజ్య లోటు ఆందోళన కలిగిస్తుంది. ఆ దేశంపై ఎక్కువగా ఆధారపడటం ద్వారా వ్యూహాత్మక చిక్కులు ఆర్థికంగానే కాకుండా జాతీయ భద్రతా పరిమాణాలను కూడా ప్రభావితం చేస్తాయని, భారత్ చైనాపై ఎక్కువగా ఆధారపడటం తగ్గించి దేశీయంగా ఉత్పాదకతను పెంచాలని GTRI వ్యవస్థాపకుడు అజయ్ శ్రీవాస్తవ అన్నారు.