Kadapa: జమ్మలమడుగులో బాంబు కలకలం
దిశ, కడప: జమ్మలమడుగులో బాంబు కలకలం సృష్టించింది. ముద్దనూరు రోడ్డులోని పెన్నానది సమీపంలోని ఓ రియల్ ఎస్టేట్ వెంచర్ స్థలం వద్ద ఒక నాటు బాంబును గుర్తించిన స్థానికులు జమ్మలమడుగు పోలీసులకు సమాచారం అందించారు. ఈ మేరకు డి.ఎస్పీ నాగరాజు, అర్బన్ సి.ఐ యు సదాశివయ్య హుటా హుటిన సంఘటనా స్థలానికి చేరుకుని విసృతంగా తనిఖీలు నిర్వహించారు. లభించిన బాంబును పోలీసులు నిర్వీర్యం చేశారు. దొరికిన బాంబు గురించి స్థానికుల నుంచి సమాచారం సేకరించారు. కాగా 2019 జులై 23న అదే స్థలంలో బకెట్లల్లో 54 బాంబులను పోలీసులు గుర్తించిన విషయం విధితమే. మళ్లీ అదే స్థలంలో ఇప్పుడు బాంబు దొరకడంతో పూర్తి స్థాయి విచారణ చేపట్టారు. సి.ఐ సదాశివయ్య మాట్లాడుతూ స్థానికులు ఇచ్చిన సమాచారం మేరకు బాంబు లభించిన ప్రదేశాన్ని పరిశీలించి చుట్టు ప్రక్కల విస్తృతంగా తనిఖీ నిర్వహించామని చెప్పారు. ఈ సంఘటన పై కేసు నమోదు చేసుకుని దర్యాప్తు చేస్తున్నమని తెలిపారు.
