వైఎస్ షర్మిల బిగ్ అనౌన్స్ మెంట్.. ఆ నియోజకవర్గం నుంచే పోటీ చేస్తా

దిశ,వెబ్‌డెస్క్: ఎవరెన్ని అడ్డంకులు సృష్టించినా తన ప్రభంజనాన్ని ఎవరూ ఆలేరని వైఎస్ షర్మిల స్పష్టం చేశారు. తండ్రి వైఎస్ కు పులివెందుల ఎలాగో తనకు పాలేరు అలాగేనని అన్నారు. వచ్చే ఎన్నికల్లో తన ప్రభంజనాన్ని ఎవరూ ఆపలేరని షర్మిల సూచించారు.

గత కొద్ది కాలంగా తెలంగాణలోని అన్ని జిల్లాలకు చెందిన వైఎస్ అభిమానులతో వైఎస్ షర్మిల చర్చిస్తున్న విషయం తెలిసిందే. అయితే కొద్ది సేపటి క్రితం లోటస్ పాండ్ లో ఖమ్మం జిల్లా పాలేరు చెందిన నేతలతో షర్మిల జరిపిన చర్చల్లో ఆసక్తికర విషయాలు వెలుగులోకి వచ్చినట్లు తెలుస్తోంది. వైఎస్ కు పులివెందుల ఎలాగో తనకు పాలేరు అలాగేనని, రాబోయే ఎన్నికల్లో పాలేరు నుంచి పోటీ చేస్తానని షర్మిల చెప్పినట్లు సమాచారం. రాబోయే సాధారణ ఎన్నికల్లో ప్రజా వ్యతిరేక పాలనకు వ్యతిరేకంగా తాను చేస్తున్న పోరాటానికి ఎంతమంది అవరోధాలు కల్పించినా గాని తాను ముందుండి పోరాటం చేస్తానని షర్మిల హామీ ఇచ్చారు.

అయితే వచ్చే నెలలో ఖమ్మం జిల్లాలో వైఎస్ షర్మిల బహిరంగ సభ నిర్వహించేందుకు వైఎస్ అభిమానులు ఏర్పాట్లు ముమ్మరం చేస్తున్నారు. ఇందుకు సంబంధించి మున్సిపాలిటీ అధికారులు అనుమతి ఇచ్చారు. ప్రస్తుతం తెలంగాణలో కరోనా కేసులు పెరిగిపోతున్న నేపథ్యంలో షర్మిల సభకు పోలీసులు ఇప్పటి వరకు అనుమతి ఇవ్వలేదు. ఇదే సమయంలో షర్మిల చేసిన వ్యాఖ్యలు రాజకీయ వర్గాల్లో హాట్ టాపిగ్గా మారాయి.