ఖురాన్‌ను తగులబెట్టడనే నేపంతో వ్యక్తిని హత్య చేసిన కేసులో 27 మంది అరెస్ట్

దిశ, నేషనల్ బ్యూరో: ఇటీవల వాయువ్య పాకిస్థాన్‌లోని ఖైబర్ పఖ్తున్ఖ్వాలో స్వాత్ జిల్లాలో పవిత్రమైన ఖురాన్‌‌లోని కొన్ని పేజీలను తగులబెట్టాడనే కోపంతో కొంతమంది ఆకాతీయులు ఒక వ్యక్తిని హత్య చేసిన విషయం తెలిసిందే. అయితే ఈ కేసులో తాజాగా 27 మంది అనుమానితులను పోలీసులు అరెస్టు చేశారు. వీరిని ప్రస్తుతం విచారిస్తున్నారు. జూన్ 20 న వాయువ్య పాకిస్థాన్‌లోని ఖైబర్ పఖ్తున్ఖ్వాలో స్వాత్ జిల్లాలో ఒక వ్యక్తి ఖురాన్‌లోని కొన్ని పేజీలను తగులబెట్టాడని గొడవ జరగడంతో నిందితుడిని అదుపులోకి తీసుకుని మద్యన్ పోలీస్ స్టేషన్‌కు తరలించారు. ఆ తర్వాత కాసేపటికి పోలీస్ స్టేషన్ బయట గుమికూడిన గుంపు అతడిని తమకు అప్పగించాలని డిమాండ్ చేసింది. అందుకు పోలీసులు నిరాకరించడంతో వారు కాల్పులు జరపడం ప్రారంభించగా పోలీసులు ఎదురు కాల్పులు జరిపారు.

ఆ తరువాత పోలీసు స్టేషన్‌, వాహనానికి నిప్పు పెట్టి, లోపలికి చొరబడి అతడిని మద్యన్ అడ్డాకు ఈడ్చుకెళ్లారు. అక్కడ రోడ్డు మధ్యలో నిందితుల గుంపు ఆ వ్యక్తికి నిప్పు పెట్టారు. ఈ ఘటనతో అక్కడి ప్రాంతంలో తీవ్ర అలజడి నెలకొంది. పరిస్థితిని అదుపులోకి తెచ్చేందుకు మద్యన్‌లో భారీగా పోలీసులను మోహరించారు. రాష్ట్ర ముఖ్యమంత్రి కెపికె అలీ అమీన్ గండాపూర్ ఈ ఘటనపై దృష్టి సారించి, నిందితులను కనిపెట్టి వారిపై చర్యలు తీసుకోవాలని ఆదేశించగా, పోలీసులు ఈ ఘటనకు పాల్పడిన అనుమానితులను అదుపులోకి తీసుకున్నారు. ఇంకా దీనిలో మరికొందరి పాత్ర కూడా ఉందని వారిని కూడా త్వరలో పట్టుకుంటామని అధికారులు తెలిపారు.