కేసీఆర్ అహానికి ఓటర్లు చెక్​పెట్టారు : విజయ శాంతి

దిశ, తెలంగాణ బ్యూరో : హుజురాబాద్‌లో కమలం విరిసిందని, దీంతో పాలకుల గుండె అదిరిందని బీజేపీ నాయకురాలు విజయశాంతి మంగళవారం ఒక ప్రకటనలో పేర్కొన్నారు. కుట్రలు, వ్యూహాలు, అబద్ధపు ఆరోపణలు, ఫేక్ న్యూస్‌, ఫేక్​లెటర్లతో ఎలాగైనా ఈటల గెలుపును అడ్డుకోవాలని అధికార పార్టీ సర్వశక్తులూ ఒడ్డిందని, అందరినీ అన్నిసార్లు మోసం చేయడం సాధ్యంకాదని తెలంగాణ ప్రజలు చాచికొట్టి టీఆర్ఎస్‌కు బుద్ధి చెప్పారన్నారు.

ఈటల ఎదుగుదలను సహించలేక ఆయనను పార్టీ నుంచి, ప్రభుత్వం నుంచి బయటకు పంపడంలో మాత్రమే కేసీఆర్ విజయం సాధించారని, కానీ ప్రజల హృదయాల నుంచి తప్పించడంలో మాత్రం ఘోరంగా విఫలమయ్యారని ఆమె పేర్కొన్నారు. ఈటలను లక్ష్యంగా చేసుకొని అధికార పార్టీ సోషల్ మీడియా వేదికగా కుప్పలు తెప్పలుగా ఫేక్ న్యూస్‌ను, ఫేక్ లెటర్లను వైరల్​చేసినా అధికార పార్టీకి ఓటమి తప్పలేదన్నారు. ప్రజలు కేసీఆర్​అహానికి చెక్​పెట్టారని విజయశాంతి పేర్కొన్నారు.