జాతీయ స్థాయి క్రీడాకారులకు సన్మానం

దిశ, జిన్నారం : సంగారెడ్డి జిల్లా, బొల్లారం ఆదర్శ పాఠశాలకు చెందిన విద్యార్థులు జాతీయ స్థాయి టగ్ ఆఫ్ వార్ పోటీల్లో పతకాలను సాధించారు. ఈ పోటీల్లో విజేతగా నిలిచిన విద్యార్థులను, వారిని ప్రోత్సహించిన పీడీ శశిరేఖను జిన్నారం ఎంపీపీ రవీందర్ గౌడ్ శాలువాలు కప్పి ఘనంగా సన్మానించారు.

సోమవారం ఎంపీపీ కార్యాలయంలో ఏర్పాటు చేసిన ఈ అభినందన కార్యక్రమంలో జాతీయస్థాయిలో సీనియర్ విభాగంలో గోల్డ్ మెడల్ సాధించిన ఏబీ నాజర్ ను ఎంపీపీ ప్రత్యేకంగా అభినందించారు. జాతీయ స్థాయిలోనే కాకుండా అంతర్జాతీయ స్థాయిలో రాణించేలా క్రీడాకారులను తీర్చిదిద్దాలని ఆకాంక్షించారు. ఈ కార్యక్రమంలో స్థానిక నాయకులు నరేందర్ గౌడ్, స్వామి, యాదగిరి, క్రీడాకారులు, తదితరులు పాల్గొన్నారు.