మంత్రగత్తెగా మారిన యువకుడు.. చివరికి..?

దిశ, మంగపేట : ములుగు జిల్లా తాడ్వాయి మండలం బంధాల గ్రామపంచాయతీ బొల్లేపల్లి గ్రామంలో తోలెం కృష్ణ (22) అనే యువకుడు మంత్రగత్తెగా మారి మంత్రాలు చేస్తున్నాడని హత్య చేశారు. విశ్వసనీయ సమాచారం మేరకు సంఘటన వివరాలు ఇలా ఉన్నాయి. బొల్లేపల్లి గ్రామంలో 6 నెలల క్రితం పూనెం మీనాకుమారి అనుమానస్పదంగా మృతి చెందింది. ఆమె మృతికి మంత్రాలే కారణమని మీనా కుమారిని కృష్ణ మంత్రాలు చేసి చంపాడని ఆమె అన్న పూనెం సురేష్, కుటుంబ సభ్యులు కృష్ణపై పగ పెంచుకున్నారు.

ఈ విషయంలో వారు అప్పటి నుండి కృష్ణను చంపేందుకు కాపు కాచి ఉన్నట్లు తెలిస్తోంది. ఈ క్రమంలో గురువారం రాత్రి కృష్ణ తన ఇంటి ఆవరణలోని నీటి గోలెం వద్దకు వచ్చి వెళ్తున్న సమయంలో అక్కడే మాటు వేసి ఉన్న సురేష్ వెనుక నుండి గొడ్డలితో కృష్ణపై దాడి చేసి తల, చెవులు భాగంలో తీవ్రంగా గాయపర్చడంతో కృష్ణ అక్కడికక్కడే మృతి చెందాడు. అనంతరం సురేష్ తాడ్వాయి పోలీసులకు లొంగిపోయినట్లు తెలిసింది. విషయం తెలుసుకున్న పోలీసులు శుక్రవారం ఉదయం బొల్లేపల్లికి చేరుకుని కేసు నమోదు చేసుకుని దర్యాప్తు జరుపుతున్నారు.