మరణించిన కార్మికులకు ఇండ్లిప్పిస్తా: కిషన్ రెడ్డి

దిశ, తెలంగాణ బ్యూరో: సికింద్రాబాద్ బోయగూడ అగ్ని ప్రమాదంలో మరణించిన బీహార్​కార్మికులకు, అక్కడి ప్రభుత్వంతో మాట్లాడి ఇండ్లు ఇప్పిస్తానని కేంద్రమంత్రి కిషన్​రెడ్డి హామీ ఇచ్చారు. బోయగూడలో అగ్నిప్రమాదానికి గురైన టీంబర్ డిపోను ఆయన ఆదివారం పరిశీలించారు. బీహార్ నుంచి వచ్చిన 11 మంది కార్మికులు చనిపోవడం బాధాకరమని సంతాపం తెలిపారు. ఈ సంఘటనను రాష్ట్ర ప్రభుత్వం సీరియస్ తీసుకోవాలని సూచించారు. గతంలో ఓల్డ్ సిటీలో ఇలాంటి ఘటనే జరిగి పేద కార్మికులు చనిపోయారని, రాత్రి సమయంలో కార్మికులు పని స్థలాల్లో పడుకోకుండా చూడాలని సూచనలు చేశారు. హైదరాబాద్ చుట్టుపక్కల ఇలాంటి ప్రదేశాలు ఎక్కడ ఉన్నాయో తెలంగాణ సర్కార్​గుర్తించాలని, భవిష్యత్‌లో ఇలాంటి ఘటనలు జరగకుండా పోలీసులు, జీహెచ్ఎంసీ, ఫైర్ సిబ్బంది సమన్వయంగా పనిచేయాలన్నారు. బాధిత కుటుంబాలకు కేంద్ర ప్రభుత్వం, బీహార్ ప్రభుత్వం కూడా సాయం అందించిందని ఆయన గుర్తుచేశారు. బీహార్ సీఎం నితీశ్​కుమార్‌తో మాట్లాడి బాధిత కుటంబాలకు ఇండ్లు అందించేందుకు కృషిచేస్తానని కిషన్​రెడ్డి హామీ ఇచ్చారు.