విద్యార్థులు అలర్ట్ : ప్రవేశ పరీక్షల షెడ్యూల్ విడుదల

దిశ,ఏపీ బ్యూరో: రాష్ట్రంలో విద్యార్థులకు ఉన్నత విద్యామండలి వివిధ ప్రవేశ పరీక్షల షెడ్యూల్‌ను మంగళవారం విడుదల చేసింది. రాష్ట్రంలో ప్రవేశ పరీక్షలు ఎప్పుడెప్పుడు నిర్వహించనుందో అధికారికంగా ప్రకటించింది. ఈఏపీసెట్, ఎడ్ సెట్, లాసెట్, పీజీఎల్ సెట్, పీజీఈసెట్, ఈసెట్, ఐసెట్ ప్రవేశపరీక్షల తేదీలను వెల్లడించింది. ఏపీలో ఇంజినీరింగ్‌, వ్యవసాయ, పార్మసీ ఉమ్మడి ప్రవేశ పరీక్ష(ఈఏపీసెట్‌) జులై 4 నుంచి జులై 12 వరకు జరగనున్నట్టు వెల్లడించింది. ఎల్ఎల్‌‌బీ ప్రవేశాల కోసం లాసెట్, బీఈడీ కోర్సుల్లో ప్రవేశాల కోసం ఎడ్‌సెట్‌, ఎల్ఎల్ఎం ప్రవేశాల కోసం పీజీ ఎల్‌సెట్‌ పరీక్షను జులై 13న నిర్వహించనున్నట్లు తెలిపింది. ఎంటెక్, ఎంఫార్మసీ ప్రవేశ పరీక్షల కోసం జులై 18 నుంచి జులై 21 వరకు పీజీ ఈసెట్‌ జరగనుంది. ఎంబీఏ, ఎంసీఏ కోర్సుల కోసం జులై 25న ఐసెట్‌ నిర్వహించనుంది. జులై 22న ఈసెట్‌ పరీక్షను నిర్వహించనున్నట్లు ఉన్నత విద్యా మండలి అధికారిక ప్రకటన విడుదల చేసింది.