ఇంఫాల్: త్వరలో మణిపూర్‌లో జరగనున్న ఎన్నికల నిర్వహణపై కేంద్రం కీలక నిర్ణయం తీసుకుంది. పోలింగ్ తేదీలను మార్చుతున్నట్లు గురువారం తెలిపింది. ఈ నెల 27, మార్చి 3 న జరగాల్సిన ఎన్నికలను ఈ నెల 28, మార్చి 5 కు మారుస్తున్నట్లు పేర్కొంది. ఈ మేరకు ప్రకటన విడుదల చేసింది. ఈ నెల 27న ఆదివారం కావడంతో వాయిదా వేయాలని క్రైస్తవ పెద్దలు, రాజకీయ నేతలు ఈసీని కోరాయి. ఇటీవలె పర్యటించిన కమిషన్ అక్కడి పరిస్థితులను సమీక్షించినట్లు అధికారులు తెలిపారు. దీంతో వారి విజ్ఞప్తిని పరిగణనలోకి తీసుకుని స్థానిక అధికారుల సూచనతో ఎన్నికల నిర్వహణ తేదీని మార్చుతున్నట్లు తెలిపారు. మొత్తం 60 స్థానాలున్న మణిపూర్ లో రెండు విడతలుగా ఎన్నికలు జరగనున్నాయి. ఈ ఎన్నికల్లో బీజేపీ ఒంటరిగా బరిలోకి దిగుతుండడం గమనార్హం. కాగా, అంతకుముందు పంజాబ్ లోనూ గురు రవిదాస్ జయంతి నేపథ్యంలో ఎన్నికల తేదీని మార్చిన సంగతి తెలిసిందే.