హీరోలందరూ లింగ వివక్ష చూపిస్తారు.. స్టార్ నటి

దిశ, సినిమా: స్టార్ నటి కృతిసనన్ బాలీవుడ్ హీరోపై ప్రశంసలు కురిపించింది. అంతేకాదు సినిమాల్లో హీరోలు పోషించే క్యారెక్టర్లు, ఇండస్ట్రీలో లింగ వివక్ష గురించి కూడా ఆసక్తికర వ్యాఖ్యలు చేసింది. ప్రస్తుతం అక్షయ్ కుమార్‌తో నటించిన 'బచ్చన్ పాండే' మూవీ ప్రమోషన్స్‌లో పాల్గొన్న ఆమె.. సినిమాల్లో తమతో సమానమైన పాత్రలు ఇచ్చేందుకు హీరోలు ఇష్టపడరని, దీన్ని బట్టి లింగ వివక్ష ఉందని అర్థం చేసుకోవచ్చని చెప్పుకొచ్చింది. కొంతమంది ఇచ్చినా తక్కువ సమయం, కొన్ని సీన్లకే పరిమితం చేస్తారన్న నటి.. అక్షయ్ కుమార్‌ మాత్రం ఎలాంటి అభద్రతాభావం లేకుండా ఏ క్యారెక్టర్ చేయడానికైనా సిద్ధపడతారని తెలిపింది.

మహిళ ప్రధాన పాత్ర పోషించే సినిమాల్లోనూ చిన్న పాత్ర చేయడానికి ఆయన వెనకాడడని చెప్పేందుకు 'అత్రంగి రే' బెస్ట్ ఎగ్జాంపుల్ అన్న ఆమె.. అలాంటి క్యారెక్టర్ చేసినందుకు ఆయన్ని మెచ్చుకోకుండా ఉండలేమంటూ ప్రశంసలు కురిపించింది. ఇక యాక్షన్, కామెడీ, డ్రామా, థ్రిల్లర్‌గా తెరకెక్కిన 'బచ్చన్ పాండే' మార్చి 18న రిలీజ్ అవుతుండగా.. అన్నీ వర్గాల ప్రేక్షకులను ఆకట్టుకుంటుందని కృతి సనన్ తెలిపింది.