దిశ, బోథ్: అంతర్జాతీయ మహిళా దినోత్సవం సందర్భంగా జాతీయ మహిళా కమిషన్ మరియు తెలంగాణ రాష్ట్ర మహిళా కమిషన్ ఆధ్వర్యంలో సంయుక్తంగా నిర్వహించిన మహిళా దినోత్సవ వారోత్సవ వేడుకలను హైదరాబాద్ లోని రవీంద్రభారతిలో నిర్వహించారు. ఇట్టి వేడుకకు రాష్ట్ర గిరిజన మరియు మహిళా సంక్షేమ శాఖ మంత్రి వర్యులు సత్యవతి రాథోడ్, విద్య శాఖ మంత్రి సబితా ఇంద్రారెడ్డి, మహిళా, శిశు సంక్షేమ అభివృద్ధి కమిషనర్ దివ్య దేవరాజన్ హాజరయ్యారు. ఈ సందర్భంగా జ్యోతి ప్రజ్వలన చేసి కార్యక్రమాన్ని ప్రారంభించారు. వివిధ రంగాల్లో రాణించిన మహిళలను సత్కరించి అవార్డులు అందించారు. అనంతరం మహిళల ఫిర్యాదులకై కొత్తగా వాట్సాప్ టోల్ ఫ్రీ నెంబర్ ను ప్రారంభించారు. అనంతరం సంవత్సర కాలంలో తెలంగాణ రాష్ట్ర మహిళ కమిషన్ చేసిన పనులను వివరించారు. ఈశ్వరీబాయిని మంత్రులు శాలువతో సన్మానించారు. కార్యక్రమంలో రాష్ట్ర మహిళా కమిషన్ చైర్మన్ సునీత లక్ష్మారెడ్డి, ఉమ్మడి ఆదిలాబాద్ నుండి మహిళా కమిషన్ సభ్యురాలిగా కొనసాగుతున్న కుమ్ర ఈశ్వరీ బాయి వారోత్సవాల్లో పాల్గొన్నారు.