'హలో వరల్డ్'.. ఆర్యన్ రాజేష్ కొత్త వెబ్ సిరీస్‌

దిశ, సినిమా : అల్లరి నరేష్ సోదరుడు ఆర్యన్ రాజేష్ హీరోగా పలు చిత్రాల్లో నటించినప్పటికీ సక్సెస్ కాలేకపోయాడు. దీంతో చాలా గ్యాప్ తర్వాత 'వినయ విధేయ రామ' చిత్రంలో రాంచరణ్‌కు బ్రదర్ క్యారెక్టర్‌లో కనిపించాడు. ఇదిలా ఉంటే.. ప్రస్తుతం 'హలో వరల్డ్' అనే వెబ్‌సిరీస్‌తో ప్రేక్షకుల ముందుకు రాబోతున్నాడు. కొత్తగా కార్పొరేట్ ప్రపంచంలోకి అడుగు పెట్టిన యువత మనోభావాల నేపథ్యంలో సిరీస్ ఉంటుందని తెలుస్తోంది. నిజానికి వర్క్ ప్లేస్ బ్యాక్‌డ్రాప్‌లో అరుదుగా సిరీస్‌లు తెరకెక్కుతుంటాయి. 'హలో వరల్డ్' కూడా అదే కోవకు చెందింది. మొత్తం 8 ఎపిసోడ్స్‌తో రూపొందిన ఈ సిరీస్.. జీ5 వేదికగా తమిళ, కన్నడ, మలయాళం, హిందీ, మరాఠీ, బెంగాలీ భాషల్లో ఆగస్టు 12 నుంచి స్ట్రీమింగ్ కానుంది. శివసాయి వర్ధన్ జలదంకి డైరెక్ట్ చేసిన ఈ సిరీస్‌లో హీరోయిన్ సదా, రామ్ నితిన్, నయన్ కరిష్మా, సుదర్శన్ గోవింద్, నిత్యా శెట్టి తదితరులు ప్రధాన పాత్రలు పోషించారు.