బిర్యానీ తినడానికి వెళ్లిన వ్యక్తికి అర్ధరాత్రి షాకిచ్చిన దుండగుడు

దిశ, భిక్కనూరు : గుర్తుతెలియని దుండగులు, బైకును తగులబెట్టిన ఘటన భిక్కనూరు మండలం లక్ష్మీ దేవునిపల్లి గ్రామంలో శనివారం అర్ధరాత్రి చోటు చేసుకుంది. ఈ సంఘటన గ్రామంలో తీవ్ర కలకలంరేపింది. ఉగాది పర్వదినాన్ని పురస్కరించుకొని రాత్రి స్నేహితులంతా కలిసి పార్టీ చేసుకున్నారు. కొందరు స్నేహితులు బిర్యానీ (Biryani) తినడానికి కారులో రాత్రి భిక్కనూరు మండల కేంద్రానికి బయల్దేరి వెళ్లారు. గ్రామానికి చెందిన నాగర్తి మహిపాల్ రెడ్డి ప్యాషన్ ప్రో బైక్ (Passion Pro bike) ను స్నేహితులతో పార్టీ చేసుకున్న స్థలం, చెరువు సమీపంలో ఉన్న పోచమ్మ ఆలయాల వద్ద పార్కు చేసి ఉంచాడు. వీరు వెళ్లిన అరగంటకే గుర్తుతెలియని దుండగులు బైకును తగులబెట్టారు. అర్ధరాత్రి ఆంజనేయ స్వామి ఆలయంలో బస చేస్తున్న, ఆంజనేయ భక్తులు ఈ విషయాన్ని గమనించి బిర్యానీ తినడానికి వెళ్లిన వారికి సమాచారం అందించారు. వారు వెంటనే గ్రామానికి చేరుకోగా అప్పటికే బైక్ పూర్తిగా తగులబడిపోయింది. బైకును తగుల పెట్టడానికి గల కారణాలు మాత్రం తెలియడం లేదు.

బైకును దహనం చేసింది ఎక్కడి నుంచో వచ్చిన వారు కాదని, స్థానికుల పనే అయి ఉండొచ్చనే అనుమానాన్ని గ్రామస్తులు వ్యక్తం చేస్తున్నారు. అర్ధరాత్రి ఒక బైక్ ఆ ప్రాంతంలో తిరిగిందన్న ఆనవాళ్లను ఆదివారం ఉదయం గ్రామస్తులు గుర్తించారు. దగ్ధమైన బైక్ విలువ లక్ష రూపాయల వరకూ ఉంటుందని బాధితుడు పేర్కొన్నారు. ఈ మేరకు బాధితుడు భిక్కనూరు పోలీసులకు ఫిర్యాదు చేశారు.