ప్రచారం చేస్తామని వాళ్లు నాకు హామీ ఇచ్చారు: బండి సంజయ్

దిశ, తెలంగాణ బ్యూరో: ఎన్నారైలంతా మళ్లీ మోడీ ప్రభుత్వమే రావాలని ఆకాంక్షిస్తున్నారని సంజయ్ తెలిపారు. ఎన్నారైలకు ఏ సమస్య వచ్చినా మోడీ ప్రభుత్వం వాటిని పరిష్కరిస్తోందన్నారు. అమెరికాలో ఎన్నారైలంతా గల్లా ఎగరేసుకుని తిరుగుతున్నారంటే కారణం మోడీ అని అక్కడి భారతీయులంతా చెబుతున్నారని ఆయన చెప్పారు. 10 రోజుల పాటు అమెరికా పర్యటనను ముగించుకుని మంగళవారం ఆయన హైదరాబాద్‌కు చేరుకున్నారు. అనంతరం ఆయన మీడియాతో మాట్లాడారు. కేంద్రంతో పాటు తెలంగాణలోనూ బీజేపీ అధికారంలోకి రావాలని ప్రవాస తెలంగాణ వాసులు కోరుకుంటున్నారని బండి సంజయ్ చెప్పారు.

తెలంగాణలో కుటుంబ పాలన అంతం కావాలని, డబుల్ ఇంజిన్ సర్కార్‌తోనే తెలంగాణ అభివృద్ధి సాధ్యమని అమెరికాలోని తెలంగాణ వాసులంతా నమ్ముతున్నారని వెల్లడించారు. సంక్రాంతి, దసరా, దీపావళి పండుగలొస్తే హైదరాబాద్ ఖాళీ అవుతుందని, అందరూ స్వస్థలాలకు వెళ్తారని, అదే తరహాలో రాబోయే ఎన్నికల్లో అమెరికాలో నివాసముంటున్న తెలంగాణ వాసులంతా స్వరాష్ట్రానికి చేరుకుని బీజేపీ పక్షాన ఎన్నికల ప్రచారం చేస్తామని, మళ్లీ మోడీ ప్రభుత్వం రావాలని ఇంటింటికీ వెళ్లి ఓటర్లను కలుస్తామని అమెరికాలోని ఎన్నారైలు తనకు హామీ ఇచ్చారని బండి సంజయ్ పేర్కొన్నారు.