నా కంటే ఎక్కువ కాలం పనిచేసిన సీఎంలు లేరు: కేసీఆర్

దిశ, వెబ్‌డెస్క్: ముఖ్యమంత్రి పదవిపై తనకు వ్యామోహం లేదని సీఎం కేసీఆర్ కీలక వ్యాఖ్యలు చేశారు. ఆదివారం ఎన్నికల ప్రచారంలో భాగంగా మాట్లాడుతూ.. తెలుగు రాష్ట్రాల్లో నా కంటే ఎక్కువ కాలం పనిచేసిన ముఖ్యమంత్రులు ఎవరూ లేరని అన్నారు. ప్రజల ఆశీస్సులతో వరుసగా రెండు సార్లు ముఖ్యమంత్రి అయ్యానని తెలిపారు. ఏనాడూ తనకు పదవులపై ఆశ లేదని, తెలంగాణ తెచ్చిన వ్యక్తి అనే పేరు చాలు అని ఆసక్తికర వ్యాఖ్యలు చేశారు. రైతులకు కష్టాలు రాకుండా బ్రహ్మండంగా పంటలు పండాలి, పేదరికం లేని రాష్ట్రంగా అవతరించాలి, కేరళలా 100 శాతం అక్షరాస్యత సాధించాలి అదే నా లక్ష్యమన్నారు. ప్రస్తుతం తనకు 70 ఏళ్లు వచ్చాయని.. ఇంకా జీవితంలో అనుభవించాల్సిన పదవులు ఏవీ లేవని చెప్పారు. ఎన్నికలు రాగానే హడావుడికి గురి కాకుండా ఆలోచించి ఓటు వేయాలని సూచించారు. ఓటు వేసే ముందు అభ్యర్థులు గుణగణాలు తెలుసుకోవాలని, గత చరిత్ర చూడాలని పిలుపునిచ్చారు. ఎట్టి పరిస్థితుల్లో ప్రలోభాలకు గురి కావొద్దని.. మోసపోతే.. గోస పడుతామని చెప్పారు.