అందరికంటే ముందే బీ-ఫామ్ అందుకున్న పల్లా

దిశ, తెలంగాణ బ్యూరో: జనగాం బీఆర్ఎస్ అభ్యర్థిగా పల్లా రాజేశ్వర్ రెడ్డి బీ-ఫారం అందుకున్నారు. అధినేత కేసీఆర్ చేతుల మీదుగా అందరికంటే ముందుగానే ప్రగతి భవన్‌లో తీసుకున్నారు. జనగాం నియోజకవర్గ అభ్యర్థిని పార్టీ లాంఛనంగా ప్రకటించకముందే బీ-ఫారం అందుకోవడం గమనార్హం. తెలంగాణ భవన్ వేదికగా మొత్తం 115 మంది అభ్యర్థుల్లో 51 మందికి స్వయంగా కేసీఆర్ అందజేయగా జనగాం క్యాండిడేట్‌గా పల్లా రాజేశ్వర రెడ్డి మాత్రం ప్రగతి భవన్‌లో అందుకున్నారు. సిట్టింగ్ ఎమ్మెల్యే ముత్తిరెడ్డి యాదగిరి రెడ్డిని అభ్యర్థిగా ప్రకటించకుండా జనగాం స్థానాన్ని ఇప్పటివరకూ పెండింగ్‌లో పెట్టిన కేసీఆర్ లాంఛనంగా అక్కడి అభ్యర్థిగా పల్లా రాజేశ్వర్ రెడ్డిని ప్రకటించకున్నా బీ-ఫారం అందజేయడం విశేషం. ఇదిలా ఉండగా ఈ నియోజకవర్గం నుంచి కాంగ్రెస్ తరఫున టికెట్ ఆశించి భంగపడిన పొన్నాల లక్ష్మయ్య తెలంగాణ భవన్‌లో కేసీఆర్‌ను కలిసి గులాబీ కండువా కప్పుకున్నారు.