సీఎం కేసీఆర్‌కు ఆయనే గురువు.. కిషన్ రెడ్డి కీలక వ్యాఖ్యలు

దిశ, డైనమిక్ బ్యూరో: ముఖ్యమంత్రి కేసీఆర్ గురువు ఎంఐఎం అధినేత అసదుద్దీన్ ఓవైసీ అని బీజేపీ స్టేట్ చీఫ్, మంత్రి కిషన్ రెడ్డి విమర్శించారు. గురువు చెప్పినట్టు శిష్యుడు కేసీఆర్ తల ఊపుతున్నాడని ఎద్దేవా చేశారు. మహిళ బిల్లు పార్లమెంట్‌లో అమోదం తెలిపినందుకు గన్‌పార్క్ నుంచి పార్టీ స్టేట్ ఆఫీస్ వరకు బీజేపీ మహిళా మోర్చా ఆధ్వర్యంలో ర్యాలీ నిర్వహించారు. ఈ సందర్భంగా కిషన్ రెడ్డి మాట్లాడుతూ.. మజ్లిస్ పార్టీ మాత్రమే మహిళా రిజర్వేషన్ బిల్లును వ్యతిరేకించిందని తెలిపారు. తెలంగాణ నుంచి గెలిచిన కాంగ్రెస్ ఎంపీలు తెలంగాణ మహిళకు క్షమాపణలు చెప్పాలని డిమాండ్ చేశారు. మహిళా బిల్లుకు ఓటు వేయకుండా పార్లమెంట్ నుంచి కాంగ్రెస్ ఎంపీలు పారిపోయారని మండిపడ్డారు. నరేంద్ర మోడీ పాలనను మరోసారి బలపర్చాలని తెలంగాణ ప్రజలకు విజ్ఞప్తి చేశారు.