కేసీఆర్ మళ్లీ గెలిస్తే రాముడు అయోధ్యలో పుట్టలేదంటాడు: బండి సంజయ్

దిశ, వెబ్‌డెస్క్: ఎన్నికల ప్రచారంలో బీజేపీ జాతీయ ప్రధాన కార్యదర్శి బండి సంజయ్ సంచలన వ్యాఖ్యలు చేశారు. ఆదివారం సంగారెడ్డి జిల్లా నారాయణఖేడ్‌లో ఎన్నికల ప్రచారం నిర్వహించారు. ఈ సందర్భంగా బండి సంజయ్ మాట్లాడుతూ.. 12 శాతం ఓట్ల కోసం ఒవైసీకి సలాం చేస్తున్నారని కాంగ్రెస్, బీఆర్ఎస్‌లపై తీవ్ర వ్యాఖ్యలు చేశారు. నారాయణఖేడ్‌లో ‘రంగస్థలం‘ మొదలైందన్నారు. 3 ఎకరాల సామాన్యుడికి.. 3వేల ఎకరాల ఆసామికి మధ్య జరుగుతున్న యుద్ధం ఇది అని వ్యాఖ్యానించారు. ఆ గట్టునుంటారా? ఈ గట్టున ఉంటారా? తేల్చుకోండి అని ఓటర్లకు పిలుపునిచ్చారు. ఎవరూ భయపడాల్సిన పని లేదన్న బండి సంజయ్.. మీ వెనుక మేమున్నాం అని భరోసా ఇచ్చారు.

ఫాంహౌజ్‌లో పడుకున్న కేసీఆర్‌ను ధర్నా చౌక్‌కు గుంజుకొచ్చినా అని అన్నారు. కేసీఆర్‌పై కొట్లాడితే నాపై 74 కేసులు పెట్టారని, అయినా డోంట్ కేర్ అన్నారు. ఒవైసీకి సవాల్ చేసి పాతబస్తీలో సభ సక్సెస్ చేసి సత్తా చాటామని చెప్పారు. 80 శాతమున్న నారాయణ్ ఖేడ్ హిందూ ఓట్లన్నీ ఏకమైతే సంగప్ప గెలవడా? అని ప్రశ్నించారు. పొరపాటున మళ్లీ కేసీఆర్‌కు అవకాశమిస్తే.. రాముడు అయోధ్యలోనే పుట్టలేదంటారేమో అనే అనుమానం వ్యక్తం చేశారు. ఖేడ్‌లో 70 ఏళ్ల కుటుంబ పాలనను బద్దలుకొట్టండి అని ఓటర్లకు పిలుపునిచ్చారు. సంగప్పను గెలిపిస్తే నారాయణఖేడ్ సస్యశ్యామలం చేస్తామని హామీ ఇచ్చారు.