KTR : నిత్యం భయంతో బతికే నీకు అన్నీ కుట్ర లాగానే అనిపిస్తాయి : కేటీఆర్

దిశ, వెబ్ డెస్క్ : ప్రతినిత్యం భయంతో బతికే నీకు అన్నీ కుట్ర లాగానే అనిపిస్తాయని సీఎం రేవంత్ రెడ్డి(CM Revanth Reddy)పై మరోసారి ట్విట్టర్ వేదికగా బీఆర్ఎస్ వర్కింగ్ ప్రెసిడెంట్ కేటీఆర్(KTR)మండిపడ్డారు. లగచర్ల ఘటన వెనుక బీఆర్ఎస్ కుట్ర ఉందన్న కాంగ్రెస్ ఆరోపణలకు కౌంటర్ వేశారు. ప్రతిక్షణం నువ్వు భయాన్ని శాసిస్తూ ఆ భయంలోనే బతుకుతున్నావని రేవంత్ రెడ్డిని విమర్శించారు. 50 లక్షల రూపాయల లంచం డబ్బులతో దొరికిన నీకు అన్నీ కుట్ర లాగానే కనిపిస్తాయని ఎద్దేవా చేశారు. మీ అల్లుడి కంపెనీ కోసం లాక్కుంటున్న భూములకు వ్యతిరేకంగా రైతుల చేస్తున్న పోరాటం కుట్రగానే కనిపిస్తుందని, మీ అన్న బెదిరింపులకు లొంగని రైతన్నల ధైర్యం కుట్రగానే కనిపిస్తుందని, ఇద్దరు వ్యక్తులు ఫోన్లో మాట్లాడుకున్న కుట్రలాగానే అనిపిస్తుందని తప్పుబట్టారు.

ప్రజలు సోషల్ మీడియాలో తమ బాధలు పోస్ట్ చేస్తే కుట్రగానే కనిపిస్తుందని, పేద గిరిజన రైతులకు అండగా నిలబడితే అది కుట్రగానే అనిపిస్తుందని, 9 నెలలపాటు నీ అపాయింట్మెంట్ కోసం వేచి చూసి, నీ బెదిరింపులన్ని తట్టుకొని, చివరికి ఎదిరిస్తే అది నీకు కుట్ర లాగానే అనిపిస్తుందని కేటీఆర్ సీఎం రేవంత్ రెడ్డిపై ఘాటు విమర్శలు గుప్పించారు. పేద రైతన్నల కుటుంబాల మీద అర్ధరాత్రి దాడులు చేసి, అక్రమంగా అరెస్టు చేసి, వారిని చిత్రహింసలకు గురిచేసినప్పుడు నేను ప్రశ్నిస్తే కుట్రలాగానే అనిపిస్తుందని, గొంతులేని వారికి గొంతుకు అయినందుకు..పేద రైతన్నల పక్షాన నిలబడినందుకు అరెస్టు చేస్తానంటే చేసుకో అని, తెలంగాణ రైతన్నల పక్షాన నిలబడి, తలెత్తుకొని గర్వంగా జైల్లోకి నడుచుకుంటూ వెళ్తానని కేటీఆర్ ప్రకటించారు.