ఉన్నపళంగా ఢిల్లీకి కిషన్ రెడ్డి.. కీలక సమయంలో హస్తిన టూర్‌పై ఆసక్తి..!

దిశ, తెలంగాణ బ్యూరో: కేంద్ర మంత్రి కిషన్ రెడ్డి అకస్మాత్తుగా హస్తినకు బయలుదేరారు. ఎన్నికలు రసవత్తరంగా సాగుతున్న సమయంలో ఢిల్లీకి వెళ్లడం చర్చనీయాంశంగా మారింది. ఉన్నపళంగా వెళ్తుండటంతో పలు అనుమానాలు వ్యక్తమవుతున్నాయి. అధిష్టానం నుంచి పిలుపు వచ్చిన మేరకు ఆయన హస్తినకు వెళ్తున్నారా? లేక ఇతర అంశాలపై హైకమాండ్‌కు వివరించేందుకు ఆయనే వెళ్తున్నారా? అనేది ఆసక్తికరంగా మారింది. ఎన్నికలకు రోజులు దగ్గరపడుతున్న క్రమంలో ఢిల్లీకి వెళ్లడంపై సర్వత్రా ఆసక్తి నెలకొంది. పార్టీలోనూ పలువురు చర్చించుకుంటున్నారు. ఇదిలాఉండగా దీనిపై కేంద్రమంత్రిని అడగగా తాను మూడు శాఖలకు కేంద్ర మంత్రిని అని, కొద్దిరోజులుగా ప్రచారంలో బిజీగా ఉండటంతో ఫైళ్లన్నీ పెండింగ్‌లో ఉన్నాయని, వాటిపై సంతకాల కోసమే వెళ్తున్నట్లుగా చెప్పడం గమనార్హం.