మునుగోడులో కూసుకుంట్ల ఘన విజయం.. ఉమ్మడి నల్గొండలో TRS హ్యాట్రిక్

దిశ, వెబ్‌డెస్క్: మునుగోడు ఉపఎన్నికలో అధికార టీఆర్ఎస్ పార్టీ అభ్యర్థి కూసుకుంట్ల ప్రభాకర్ రెడ్డి ఘన విజయం సాధించారు. సమీప బీజేపీ అభ్యర్థి కోమటిరెడ్డి రాజగోపాల్ రెడ్డిపై టీఆర్ఎస్ అభ్యర్థి ప్రభాకర్ రెడ్డి 11,666 ఓట్లతో ఘన విజయం సాధించారు. మునుగోడు గెలుపుతో ఉమ్మడి నల్గొండ జిల్లాలో జరిగిన ఉపఎన్నికల్లో టీఆర్ఎస్ పార్టీ హ్యాట్రిక్ విజయం సాధించింది. ముందుగా.. హుజూర్ నగర్, తర్వాత నాగార్జున సాగర్, తాజాగా.. మునుగోడు ఉప ఎన్నికల్లో టీఆర్‌ఎస్ వరుసగా గెలుపొందింది. ఉమ్మడి నల్గొండ జిల్లాలో కాంగ్రెస్ పార్టీని క్లీన్ స్వీప్ చేసేసిన టీఆర్ఎస్ పార్టీ అవతరించింది. తాజా గెలుపుతో ఉమ్మడి నల్లగొండ జిల్లాలో 12 నియోజకవర్గాల్లో 12 మంది టీఆర్ఎస్ ఎమ్మెల్యేలే ఉండటం గమనార్హం. కాగా, మునుగోడులో సిట్టింగ్ స్థానాన్ని కోల్పోయిన కాంగ్రెస్ పార్టీ మూడో స్థానానికి పరిమితమైంది.