పార్క్ చేసిన బస్సు చోరీ

దిశ, తెలంగాణ క్రైమ్ బ్యూరో: బైకో... కారో చోరీ చేస్తే ఏం కిక్కనుకున్నాడో ఏమో ఓ వ్యక్తి ఏకంగా బస్సునే దొంగిలించాడు. వివరాలు ఇలా ఉన్నాయి. కర్ణాటక రాష్ట్రం చించొల్లి బస్ స్టేషన్‌లో పార్క్ చేసి ఉన్న బస్సును మంగళవారం అర్ధరాత్రి దాటిన తర్వాత అగంతకుడు నడుపుకుంటూ తీసుకెళ్లి పోయాడు.

కొద్దిసేపు తర్వాత బస్సు లేదని గమనించిన సిబ్బంది గుల్బర్గా డిపో మేనేజర్‌కు సమాచారం ఇచ్చారు. ఆయన చించొల్లి పోలీసులకు ఫిర్యాదు చేసాడు. వెంటనే రంగంలోకి దిగిన చించొల్లి పోలీసులు సరిహద్దుల్లో ఉన్న తాండూర్ పోలీసులను అలర్ట్ చేశారు. గాలింపు జరుపగా బస్సు తాండూర్ సమీపంలోని భూకైలాస్ ప్రాంతంలో దొరికింది.