TGPSC: గ్రూప్ 3 ప్రశాంతం.. చివరి పరీక్షకు 50.24 శాతం హాజరు

దిశ, తెలంగాణ బ్యూరో : రాష్ట్రంలో రెండ్రోజులుగా జరుగుతున్న గ్రూప్ 3 పరీక్షలు(Group 3 Examinations) సోమవారం ముగిశాయి. చివరిరోజు పరీక్షకు కేవలం 50.24 శాతం మంది మాత్రమే హాజరయ్యారు. మొత్తం 1363 పోస్టుల భర్తీకి తెలంగాణ పబ్లిక్ సర్వీస్​ కమిషన్(Telangana Public Service Commission) ఆదివారం రాత పరీక్షలు ప్రారంభించింది. గ్రూప్ 3 పరీక్ష కోసం మొత్తం 5,36,400 మంది దరఖాస్తు చేసుకున్నారు. ఆదివారం జరిగిన పేపర్1 జనరల్ స్టడీస్ అండ్ జనరల్ ఎబిలిటీస్(General Studies and General Abilities) కు 51.1 శాతం మంది, పేపర్ 2 హిస్టరీ, పాలిటీ అండ్ సొసైటీ(History, Polity and Society) పరీక్షకు 50.7 శాతం మంది హాజరయ్యారు. కాగా సోమవారం ఉదయం జరిగిన పేపర్ 3 ఎకానమీ అండ్ డెవలప్ మెంట్(Economy And Development) ఎగ్జామ్ కు 2,69,483 అంటే 50.24 శాతం అభ్యర్థులు మాత్రమే హాజరయ్యారు. ఇదిలా ఉండగా పేపర్ 3 లోనూ తెలంగాణ స్కీములపై పలు ప్రశ్నలు వచ్చాయి. హైడ్రా(HYDRA), రైతు రుణమాఫీ, ఇందిరమ్మ ఇండ్ల స్కీములు(Indiramma Housing Schemes), తెలంగాణ స్కిల్ యూనివర్సిటీ(Telangana Skill University)పై, 2011 జనాభా లెక్కలు, ఐదో కుటుంబ సర్వేకు సంబంధించిన ప్రశ్నలు రావడం గమనార్హం.