సరూర్ నగర్ స్టేడియంలో ‘తెలంగాణ భరోసా సభ’.. ముఖ్యఅతిథిగా మాయావతి

దిశ, తెలంగాణ బ్యూరో: బహుజన్ సమాజ్ పార్టీ ఆధ్వర్యంలో నేడు (ఆదివారం) సరూర్ నగర్ స్టేడియంలో తెలంగాణ భరోసా సభ పేరుతో బహిరంగ సభను నిర్వహించనున్నారు. సభకు ముఖ్య అతిథిగా బీఎస్పీ జాతీయ అధ్యక్షురాలు మాయావతి హాజరవుతున్నారు. ఈ సందర్భంగా శనివారం సాయంత్రం మాయావతి హైదరాబాద్ చేరుకున్నారు. బేగంపేట ఎయిర్ పోర్టులో పార్టీ శ్రేణులు ఘన స్వాగతం పలికారు. తెలంగాణ రాష్ట్ర అధ్యక్షుడు ఆర్ఎస్ ప్రవీణ్ కుమార్, తెలంగాణ రాష్ట్ర ఇంచార్జ్ రాజ్యసభ ఎంపీ రాంజీ గౌతమ్, రాష్ట్ర చీఫ్ కో ఆర్డినేటర్ మంద ప్రభాకర్, చంద్రశేఖర్ ముదిరాజ్ తదితరులు హాజరైనారు.

తెలంగాణ రాష్ట్ర రాజకీయాలు, బహుజన్ సమాజ్ పార్టీ కార్యక్రమాల వివరాల గురించి రాష్ట్ర అధ్యక్షుడు, ముఖ్య నాయకులతో కలిసి మాయావతి చర్చిస్తున్నారు. ఈ భహిరంగ‌ సభ కోసం ఆమె అభిమానులు, పార్టీ శ్రేణులు ఎంతగానో ఎదురుచుస్తు్న్నారు. ఆర్ఎస్ ప్రవీణ్ కుమార్ రాష్ట్ర అధ్యక్షుడు అయ్యాక మొదటి సారి ఆమె తెలంగాణ రావడం, సభలో ఆమె ఏమి మాట్లాడుతారనే ఉత్కంఠగా ఎదురు చూస్తున్నారు. ఈ నేపథ్యంలో సభ తర్వాత రాష్ట్రంలో రాజకీయ పరిస్థితులు ఏ విధంగా ఉంటాయని రాజకీయ వర్గాలు ఆసక్తిగా ఎదురుచూస్తున్నారు.