6న పాలేరులో షర్మిల నామినేషన్.. క్లారిటీ ఇచ్చిన లోటస్ పాండ్

దిశ, తెలంగాణ బ్యూరో: వచ్చే అసెంబ్లీ ఎన్నికల్లో పోటీ చేసేందుకు వైఎస్సార్ తెలంగాణ పార్టీ అధినేత్రి షర్మిల ఏర్పాట్లు చేసుకుంటోంది. పాలేరు బరిలో నుంచే ఆమె పోటీ చేయనున్నట్లు లోటస్ పాండ్ వర్గీయులు బుధవారం ఒక ప్రకటనలో తెలిపారు. అందులో భాగంగా ఈనెల 6వ తేదీన ఆమె పాలేరులో నామినేషన్ వేయనున్నట్లు తెలిపారు. కాంగ్రెస్ పార్టీతో విలీనం అంశం బెడిసి కొట్టడంతో ఆమె సింగిల్ గానే బరిలోకి దిగాలని భావిస్తున్నారు. కాగా అదే స్థానం నుంచి కాంగ్రెస్ తరుపున పొంగులేటి శ్రీనివాస్ రెడ్డి పోటీ చేస్తున్నారు. తాను పోటీ చేస్తే ఆది నుంచి అండగా పొంగులేటి ఉంటారని భావించిన షర్మిల ఆయనపైనే పోటీకి దిగాలనుకోవడం గమనార్హం. ఇదిలా ఉండగా రాష్ట్ర వ్యాప్తంగా 50 సభలు నిర్వహించాలని షర్మిల సన్నాహకలు చేస్తున్నట్లు సమాచారం.