గంజాయి సేవించిన షణ్ముఖ్ అరెస్ట్…18 గ్రాముల స్వాధీనం

దిశ, గండిపేట్: బిగ్ బాస్ ఫేమ్, యూట్యూబర్ షణ్ముక్ జశ్వంత్‌ను నార్సింగ్ పోలీస్ స్టేషన్ పోలీసులు అరెస్ట్ చేశారు. ఇందుకు సంబంధించిన వివరాలను ఏసీపీ రమణ గౌడ్ మీడియాకు వెల్లడించారు. యూట్యూబర్  షణ్ముక్  అన్న సంపత్ ఓ అమ్మాయిని ప్రేమ పేరుతో మోసం చేశాడు. ఆమెను పెళ్లి చేసుకుంటాడని చెప్పి  పలుమార్లు శారీరకంగా అనుభవించాడని తెలిపారు. అంతేకాకుండా ప్రేమించిన యువతిని కాదని, మరో అమ్మాయిని పెళ్లి చేసుకుంటున్నాడని సంపత్(31) పై ఆ యువతి ఫిర్యాదు చేసింది. ఆమె ఫిర్యాదు మేరకు  ఎస్సై అశోక్ వర్మ, సిబ్బందితో సంపత్ కోసం అతడి ఫ్లాట్ కు  వెళ్లారు. అతని ప్లాట్‌ను సోదా చేయగా యూట్యూబర్ షణ్ముక్ జశ్వంత్ అనే వ్యక్తి గంజాయితో పట్టుబడ్డాడు. అతన్ని అదుపులోకి తీసుకొని అతని దగ్గర నుండి 18 గ్రాముల గంజాయిని స్వాధీనం చేసుకున్నారు. షణ్ముఖ్ గంజాయి సేవించాడని వైద్య పరీక్షల్లో నిర్ధారణ కావడంతో నార్సింగి పోలీసులు అరెస్టు చేసి రిమాండ్ కు తరలించారని ఏసీపీ రమణ గౌడ్ చెప్పారు.