వ్యవసాయానికి 24 గంటల విద్యుత్​ ఉత్తిమాటే : డీసీసీ అధ్యక్షుడు టి.రామ్మోహన్​ రెడ్డి

దిశ, పరిగి : వ్యవసాయానికి 24 నిరంతర ఉచిత విద్యత్​ అందిస్తున్నామని గొప్పులు చెబుతున్నదంతా ఉట్టిమాటేనంటూ డీసీసీ అధ్యక్షుడు, పరిగి మాజీ ఎమ్మెల్యే టి.రామ్మోహన్​ రెడ్డి తప్పుపట్టారు. టీపీసీసీ అధ్యక్షుడు రేవంత్​ రెడ్డి పిలుపు మేరకు పరిగి విద్యుత్​ ఏడీ కార్యాలయం ముందు సోమవారం కాంగ్రెస్​ నాయకులతో కలిసి ధర్నా నిర్వహించారు. ఈ సందర్బంగా డీసీసీ అధ్యక్షుడు టి.రామ్మోహన్​ రెడ్డి అసెంబ్లీలో బహిరంగ సభలలో ముఖ్యమంత్రి కేసీఆర్ 24 గంటల ఉచిత కరెంట్ రైతుల పంటపొలాలకు ఇస్తున్నామని గొప్పగా చెప్పుకోవడం అవాస్తవమన్నారు.

రైతులకు కేవలం 8 గంటలే విద్యుత్​ సరఫరా అవుతుందన్నారు. కాంగ్రెస్​ ప్రభుత్వ హాయంలోనే తన కృషివల్లే సోలార్​, విండ్​ పవర్​ ఏర్పాటై పరిగి విద్యుత్​ ఉత్పత్తి కేంద్రంగా తీర్చి దిద్దానన్నారు. నజీరాబాద్​ 220/132 కేవీ విద్యుత్​ సబ్​ స్టేషన్​ మంజూరీ చేయించి పనులు పూర్తై విద్యుత్​ సరఫరా అవుతున్నా నేటికి సబ్​ స్టేషన్​ను ప్రారంభించలేదని దౌర్బాగ్య స్థితిలో బీఆర్​ఎస్​ పార్టీ, స్థానిక పాలుకులు ఉన్నారంటూ మండిపడ్డారు. దోమ మండలం కిష్టాపూర్​ సబ్​ స్టేషన్​ మంజూరీ చేయించినా స్థలం కేటాయించకపోవడం వల్లే పనులు ప్రారంభం కావడం లేదన్నారు.

పరిగికి రానున్నరోజుల్లో హైద్రాబాద్ పరిసర ప్రాంతాల్లో ఉన్నవ్యవసాయ ఆధారిత పరిశ్రమలు వొస్తాయని వాటికి కరెంట్ సరఫరా కావాలి అంటే 400/220 కేవీ సబ్​ స్టేషనల్​ పరిగికి కావాలన్నారు. అలాగే సాగునీటి ప్రాజెక్టుల ద్వారా నీరు రావాలంటే కరెంట్ అవసరమని భవిష్యత్తును దృష్టిలో ఉంచుకొనే కరెంట్ సబుస్టేషన్ లకు కృషి చేశానని అన్నారు. ఈ కార్యక్రమంలో డీసీసీ ప్రధానకార్యదర్శి కె.హనుమంతు ముదిరాజ్, పరిగి టౌన్​ అధ్యక్షుడు ఎర్రగడ్డపల్లి కృష్ణ, మండల కాంగ్రెస్ పార్టీ అధ్యక్షులు పరుశురాం రెడ్డి, ఆంజనేయులు, సురేందర్, ఆనెం ఆంజనేయులు, చిన్న నర్సింలు, వెంకటేష్, డి.అశోక్, శేషారెడ్డి, రవి నాయక్​ తదితరులు పాల్గొన్నారు.