Mallareddy: "ఫోటోలు మంచిగ రావాలె".. వైరల్ అవుతున్న మల్లారెడ్డి ఫన్నీ వీడియో

దిశ, డైనమిక్ బ్యూరో: "ఫోటోలు మంచిగ రావాలె.. అందరూ జరిగి మంచిగ నిలబడండి అమ్మా" అని మాజీ మంత్రి మల్లారెడ్డి ఫోటోల కోసం తెగ హాడావుడి చేసిన వీడియో నెట్టింట చక్కర్లు కొడుతోంది. మేడ్చల్ బీఆర్ఎస్ ఎమ్మెల్యే మల్లారెడ్డి గురించి ప్రత్యేకంగా చెప్పనక్కర్లేదు. ఆయన మీడియా ముందుకు వచ్చినా, స్టేజీ ఎక్కి మైక్ అందుకున్నా, అసెంబ్లీలో మాట్లాడినా నవ్వుల పువ్వులు పూయిస్తారు. పాలు అమ్మినా.. పూలు అమ్మినా అనే డైలాగ్ తో తెగ ఫేమస్ అయిపోయారు. ఆయన కొట్టే డైలాగులు ఇట్టే ప్రజల్లోకి వెళ్లిపోతాయి. ఆయన ఎక్కడ ఉంటే అక్కడ సరదా వాతావరణం నెలకొంటుంది. ఈ నేపథ్యంలోనే మల్లారెడ్డికి చెందిన ఓ ఫన్నీ వీడియో సోషల్ మీడియలో తెగ తిరుగుతోంది.

కీసర ఎంపీడీవో కార్యాలయంలో కల్యాణలక్ష్మి, షాదీ ముబారక్ చెక్కుల పంపిణీ కార్యక్రమం జరిగింది. ప్రోటోకాల్ ప్రకారం ఎమ్మెల్యే మల్లారెడ్డి, ఎంపీ ఈటెల రాజేందర్ పాల్గొని చెక్కులు పంపిణీ చేశారు. అనంతరం మీడియాకు ఇచ్చే ఫోటోల కోసం మల్లారెడ్డి చేసిన హడావుడి అంతా ఇంతా కాదు. చెక్కుల కోసం వచ్చిన మహిళలను దగ్గరుండి లైన్ లో నిలబెట్టి, అందరూ చెక్కులు ఫోటోలకు చూపించాలని కోరాడు. తర్వాత ఆయన కూడా వెళ్లి నిలబడి' పెద్ద మొత్తంలో చెక్కులు పంచాము.. ఫోటోలు మంచిగ రావాలె' అని ఫోటోగ్రాఫర్లకు చెబుతూ.. ఫోటోలకు ఫోజులు ఇచ్చారు. తర్వాత ఈ చెక్కులు ఎప్పటివీ అని ఈటెల అడగగా.. గత ప్రభుత్వ హయాంలోనివి అని, ఈ ప్రభుత్వానివి అయితే బంగారం కూడా వస్తుండే అని చమత్కరించారు. అనంతరం మీడియా ప్రతినిధులు మాట్లాడాలని కోరగా.. సార్ ఉన్నప్పుడు నేను మాట్లాడితే బాగుందు అని సరదాగా మాట్లాడి వెళ్లిపోయారు.