ఆర్టీసీ బస్సు కిందపడ్డ మహిళ

దిశ,తాడ్వాయి: మండల కేంద్రంలో ఘోర రోడ్డు ప్రమాదం చోటుచేసుకుంది. ఆర్టీసీ బస్సు ఎక్కే క్రమంలో పట్టుతప్పి ఓ మహిళ కింద పడింది. దీంతో ఆమె ఎడమ కాలు పూర్తి స్థాయిలో నుజ్జు నుజ్జు అయ్యింది. ఈ ఘటన మండల కేంద్రంలో బుధవారం చోటుచేసుకుంది. స్థానికులు తెలిపిన వివరాల ప్రకారం..చిట్యాల గ్రామానికి చెందిన కంసవ్వ (55) తాడ్వాయి బస్టాండ్ లో ఎక్కే క్రమంలో ప్రమాదవశాత్తు కాలుజారి కింద పడింది. ఎడమ కాలుకు తీవ్రంగా గాయాలు కాగా..ప్రాణాపాయ స్థితిలో కొట్టుమిట్టాడుతున్న ఆ మహిళను స్థానికుల సహాయంతో కామారెడ్డి ప్రభుత్వ ఆసుపత్రికి తరలించారు. మహిళ పరిస్థితి విషమించడంతో మెరుగైన వైద్యం కోసం గాంధీ హాస్పిటల్ తరలించినట్లు సమాచారం. అయితే బస్సు ప్రయాణికులతో కిక్కిరిసిపోయి ఫుట్ బోర్డు వరకు ప్రయాణికులు ఉండడంతో..బస్ డ్రైవర్ గమనించలేకపోయాడని స్థానికులు అన్నారు. దీంతో రెప్పపాటులో ఈ ఘోరం జరిగిపోయిందని తెలిపారు. ఈ విషాద దృశ్యం అక్కడున్న వారందరిని కలచివేసింది.